वैदेशिक रोजगारीको प्रलोभन देखाएर लाखौं रुपैयाँ ठगी गर्ने चार जना पक्राउ

काठमाडौं । आकर्षक तलबसहित विभिन्न मुलुकमा रोजगारी लगाइदिने भन्दै बेरोजगार युवायुवतीबाट रकम असुली ठगी गरेको आरोपमा चार जना पक्राउ परेका छन् ।

काठमाडौँ उपत्यका अपराध अनुसन्धान कार्यालयले वैदेशिक रोजगारीमा पठाउने आश्वासन दिएर रकम लिएपछि सम्पर्कविहीन भएका व्यक्तिहरूविरुद्ध परेको उजुरीका आधारमा उनीहरूलाई उपत्यकाका विभिन्न स्थानबाट नियन्त्रणमा लिएको हो ।

पक्राउ पर्नेमा काभ्रेपलाञ्चोक मण्डनदेउपुर–१ का ३३ वर्षीय कविराज चौलागाईं, सुनसरी इनरुवा–१ का ३४ वर्षीय गोपाल भण्डारी, अर्घाखाँची पाणिनी–५ का २९ वर्षीय गोविन्द घिमिरे र उदयपुर बेलका–३ का २८ वर्षीय रुपेश माल रहेका छन् । उनीहरू हाल काठमाडौं तथा ललितपुरका विभिन्न स्थानमा बस्दै आएका थिए ।

प्रहरीका अनुसार चौलागाईंले इटाली पठाउने भन्दै एक जनाबाट १० लाख रुपैयाँ लिएको आरोप छ । त्यस्तै, भण्डारीले मलेसिया पठाइदिने भन्दै एक पीडितबाट १ लाख रुपैयाँ असुलेको पाइएको छ ।

घिमिरेमाथि दुई जनालाई दक्षिण कोरिया पठाउने भन्दै ६ लाख ४५ हजार रुपैयाँ लिएको आरोप छ । मालले भने स्वीडेन पठाइदिने आश्वासन दिएर एक जनाबाट २ लाख ६० हजार रुपैयाँ लिएको प्रहरीले जनाएको छ ।

पीडितहरूलाई लामो समयसम्म विदेश पठाउने आश्वासन दिँदै रकम लिए पनि प्रक्रिया अघि नबढाई सम्पर्कविहीन भएपछि उनीहरूले प्रहरीमा उजुरी दिएका थिए । पक्राउ परेका चारै जनालाई थप अनुसन्धान तथा कानुनी कारबाहीका लागि वैदेशिक रोजगार विभाग, ताहाचल पठाइएको काठमाडौँ उपत्यका अपराध अनुसन्धान कार्यालयले जनाएको छ ।