पश्चिम नवलपरासीमा अढाई वर्षीया बालिकामाथि यौन हिंसाको आशंका, प्रहरीले थाल्यो अनुसन्धान

पश्चिम नवलपरासी। पश्चिम नवलपरासीको प्रतापपुर गाउँपालिका–९, खजुरा खोला नजिकै आइतबार राति करिब ११ बजे अढाई वर्षीया बालिकामाथि यौन हिंसा भएको आशंका गरिएको छ। परिवारका सदस्यहरू घरबाहिर गएको समयमा घटना भएको स्थानीयले बताएका छन्।

स्थानीयका अनुसार गाउँकै एक व्यक्तिको करेसाबारीमा भाँटा चोरी भइरहेको जानकारी गराउन बालिकाका बुबा, आमा र जेठी छोरी गएको समयमा बालिका घरमै सुतिरहेकी थिइन्। घटनाबारे स्थानीयले तत्काल प्रहरीलाई खबर गरेका थिए।

घटनापछि बालिकालाई राति नै उपचारका लागि लगिएको जनाइएको छ। उनको अवस्था हाल सामान्य रहेको बताइएको छ।

यस विषयमा जिल्ला प्रहरी कार्यालय पश्चिम नवलपरासीका प्रहरी नायब उपरीक्षक एवं सूचना अधिकारी मदन थापासँग बुझ्दा उनले घटना संवेदनशील र मर्यादित विषय भएकाले अहिले थप विवरण सार्वजनिक गर्न नमिल्ने बताए। उनका अनुसार बालिकाको अवस्था सामान्य रहेको छ।

घटनामा संलग्न व्यक्तिबारे विभिन्न आशंका गरिए पनि त्यसको आधिकारिक पुष्टि हुन बाँकी छ। प्रहरीले घटनाबारे अनुसन्धान अघि बढाएको जनाएको छ।