दुई वर्षीया नाबालिकाको हत्या,एक जना पक्राउ , अनुसन्धान अगाडि बढायो प्रहरीले

राजविराज । सप्तरीको शम्भुनाथ नगरपालिकामा दुई वर्षीया नाबालिकाको हत्या भएको छ। घटनामा संलग्न रहेको आशंकामा प्रहरीले एकजनालाई नियन्त्रणमा लिएर अनुसन्धान अघि बढाएको छ।

शम्भुनाथ नगरपालिका–३ का मोहम्मद इरफानकी दुई वर्षीया छोरी खुशी खातुन आइतबार बिहान घरबाट हराएकी थिइन्। बालिका बेपत्ता भएको करिब दुई घण्टापछि घरको पछाडिपट्टि रहेको झाडीमा उनको शव फेला परेको हो।

नाबालिका हराएको जानकारी पाएलगत्तै प्रहरीले खोजी सुरु गरेको थियो। खोजी गर्ने क्रममा घरनजिकैको झाडीमा मृत अवस्थामा फेला परेपछि घटनाबारे अनुसन्धान अघि बढाइएको सप्तरी प्रहरीले जनाएको छ।

सप्तरीका प्रहरी प्रमुख एसपी रूपक खड्काका अनुसार प्रारम्भिक अनुसन्धानबाट व्यक्तिगत रिसइबीका कारण बालिकाको हत्या भएको हुनसक्ने देखिएको छ।

घटनासँग सम्बन्धित रहेको आशंकामा एकजनालाई पक्राउ गरी सोधपुछ तथा अनुसन्धान भइरहेको प्रहरीले जनाएको छ। पक्राउ परेका व्यक्तिको परिचय र हत्याको कारणबारे थप विवरण अनुसन्धानपछि सार्वजनिक गरिने प्रहरीले जनाएको छ।