प्रहरीसँग विवादपछि हातपातमा उत्रिएका वडाध्यक्ष पक्राउ, भाइलाई भगाएको आरोप

रुकुम पश्चिम। अनुसन्धानका लागि खोजी भइरहेका भाइलाई प्रहरीबाट जोगाउन खोज्दा रुकुम पश्चिमका एक वडाध्यक्ष आफैं प्रहरी हिरासतमा पुगेका छन्।

आठबिसकोट नगरपालिका–३ का वडाध्यक्ष केशरमान विकलाई प्रहरीले मुसिकोट नगरपालिका–१ स्थित कालिका मन्दिर नजिकबाट पक्राउ गरेको हो। उनका भाइ गोपाल विक भन्ने वीरेन्द्र विकविरुद्ध अभद्र व्यवहारसम्बन्धी जाहेरी परेपछि प्रहरीले उनलाई खोजिरहेको थियो।

मंगलबार बिहान करिब ९ बजे वीरेन्द्र र वडाध्यक्ष केशरमान एकै ठाउँमा भेटिएपछि प्रहरीले वीरेन्द्रलाई जाहेरीबारे जानकारी गराउँदै जिल्ला प्रहरी कार्यालयमा उपस्थित हुन भनेको थियो। त्यस क्रममा वडाध्यक्षले प्रहरीको काममा हस्तक्षेप गर्दै विवाद गरेको प्रहरीले जनाएको छ।

प्रहरीका अनुसार विवाद बढेपछि केशरमानले प्रहरी कर्मचारीलाई गालीगलौज गर्नुका साथै धकेलाधकेल र हातपात गरेका थिए। उनले भाइ वीरेन्द्रलाई समेत त्यहाँबाट भगाएको र प्रहरी कर्मचारीको पोसाक च्यातिएको प्रहरीको दाबी छ।

त्यसपछि प्रहरीले केशरमानलाई नियन्त्रणमा लिएर जिल्ला प्रहरी कार्यालय पुर्‍याएको हो।

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक झविन्द्र परियारका अनुसार वडाध्यक्षविरुद्ध ‘राष्ट्रसेवकलाई बाधा विरोध गर्न नहुने’ कसूरमा अनुसन्धान अघि बढाइएको छ। जिल्ला प्रशासन कार्यालयबाट तीन दिनको म्याद लिएर उनलाई हिरासतमा राखिएको उनले बताए।

घटनाको थप अनुसन्धान भइरहेको प्रहरीले जनाएको छ।