निलम्बित एपीएफ एआईजी दाहालविरुद्ध छानबिन गर्न अर्का एआईजी खटिए

काठमाडौं। सशस्त्र प्रहरी बल (एपीएफ) का निलम्बित अतिरिक्त महानिरीक्षक (एआईजी) वंशीराज दाहालमाथि लागेको आरोपको छानबिन प्रक्रिया अघि बढेको छ। गृह मन्त्रालयले दाहालमाथि जाँचबुझ गर्न सशस्त्र प्रहरीकै एआईजी अन्जनीकुमार पोखरेललाई जिम्मेवारी दिएको छ।

मानव स्रोत विभागमा कार्यरत पोखरेललाई सशस्त्र प्रहरी नियमावली, २०७२ मा रहेको व्यवस्थाअनुसार जाँचबुझ अधिकृत तोकिएको गृह मन्त्रालयका एक उच्च अधिकारीले बताएका छन्।

दाहालमाथि सुरक्षा तथा संवेदनशील सूचना चुहाएको आरोप छ। पूर्वप्रधानन्यायाधीश चोलेन्द्रशमशेर जबरालाई टेकुस्थित उपत्यका अपराध अनुसन्धान कार्यालयमा भेट्न पुगेको विषयलाई समेत अनुसन्धानको दायरामा राखिएको छ। यही आरोपमा गृह मन्त्रालयले उनलाई सोमबार निलम्बन गरेको थियो।

अनुसन्धानका क्रममा दाहाल र झापाका बिचौलिया इनम सापकोटाबीचको सम्बन्धसमेत खुलेको बताइएको छ। प्रहरीको प्रारम्भिक अनुसन्धानले सापकोटामार्फत सम्पत्ति शुद्धीकरण मुद्दामा पक्राउ परेका दीपक भट्ट र सुलभ अग्रवालको मुद्दामा प्रभाव पार्ने प्रयास भएको आशंका गरेको छ।

यस प्रकरणका अर्का महत्वपूर्ण पात्र मानिएका सापकोटा असोज १४ गते त्रिभुवन अन्तर्राष्ट्रिय विमानस्थलबाट पक्राउ परेका थिए। उनी नयाँ दिल्ली जाने तयारीमा रहेको अवस्थामा पक्राउ परेका हुन्।

अब जाँचबुझ अधिकृत पोखरेलले दाहालमाथि लागेको आरोपसँगै घटनासँग जोडिएका व्यक्तिहरू र उनीहरूबीचको सम्बन्धबारे समेत छानबिन गर्नेछन्।