१ सय १० किलोभन्दा बढी गाँजासहित तीन जना सशस्त्र प्रहरीको नियन्त्रणमा

काठमाडौं ।  सशस्त्र प्रहरीले सिरहाबाट ठूलो परिमाणमा प्रतिबन्धित लागूऔषध गाँजासहित तीन जनालाई नियन्त्रणमा लिएको छ।

विशेष सूचनाका आधारमा सशस्त्र प्रहरी बल, नेपाल नं.७ गण हेडक्वार्टर सिरहाबाट खटिएको टोलीले औरही गाउँपालिका–१ दरैया इलाकामा आज बिहान चेकजाँच गर्ने क्रममा गाँजा बरामद गरेको हो।

सशस्त्र प्रहरीका अनुसार भारततर्फ लैजाँदै गरिएको अवस्थामा ६ बोरामा रहेको ११० किलो ७६० ग्राम गाँजासहित तीन जनालाई नियन्त्रणमा लिइएको हो।

नियन्त्रणमा लिइएका व्यक्ति र बरामद गाँजालाई आवश्यक अनुसन्धान तथा कारबाहीका लागि सम्बन्धित निकायमा बुझाउने प्रक्रिया भइरहेको सशस्त्र प्रहरीले जनाएको छ।