काठमाडौंको मखन टोलमा भीषण आगलागी,एक महिलाको मृत्यु

काठमाडौं । काठमाडौंम आगलागी हुँदा एक महिलाको मृत्यु भएको छ। जिल्ला प्रहरी परिसर काठमाडौंका अनुसार काठमाडौं महानगरपालिका-२४ स्थित मखन टोलमा आज बिहान ६ बजेदेखि लागेको भीषण  आगलागी हुँदा एक महिलाको मृत्यु भएको हो।

आगलागीमा परी एकजना महिलाको मृत्यु भएको र उनको सनाखत हुन बाँकी रहेको काठमाडौं प्रहरी परिसरका  प्रवक्ता एसपी अपिल राज बोहराले जानकारी दिएका छन् ।

सुरज आर्केड पछाडि पर्ने मखन गल्लीमा रहेको दयाराम श्रेष्ठको ४ तले घरबाट आगलागी सुरू भएको थियो । माटो र काठले बनेको कच्ची घरको तेस्रो तल्लामा ग्याँस लिक भई आगलागी सुरु भएको प्रहरीले जनाएको छ ।

दयारामको घरसँगै रहेको रुकेश श्रेष्ठको ५ तले पक्की घरमा समेत आगो सल्किएको थियो ।

आगो निभाउन काठमाडौं र ललितपुरका ६ वटा दमकल प्रयोग गरिएको थियो।  नेपाली सेना, सशस्त्र प्रहरी, नेपाल प्रहरी र महानगर प्रहरी खटिएको टोलीले करिब साढे ३ घन्टापछि आगो नियन्त्रणमा लिएको ५ प्रहरीले जानकारी दिएको छ।