विद्यार्थी-शिक्षकलाई 'साइबर अपराध' सचेतना

नेपालगन्ज । नेपालगन्जका विभिन्न सामुदायिक विद्यालयका विद्यार्थी तथा शिक्षक प्रतिनिधिहरुका लागि ‘साइबर अपराध सचेतना कार्यक्रम’ आयोजना गरिएको छ । सय बढी विद्यार्थीहरुबीच  नेपालगन्ज उपमहानगरपालिकाका नगर प्रमुख प्रशान्त विष्टले कार्यक्रम उद्घाटन गरेका हुन् ।

कार्यक्रममा उद्घाटन मन्तव्य व्यक्त गर्दै नगर प्रमुख विष्टले साइबर अपराधको बढ्दो घटना न्यूनीकरणमा विद्यालयस्तरबाट नै सचेतना जगाउन यसरी कार्यक्रम गरिएको बताए । डटवर्क्स टेक्नोलोजीले नेपालगन्ज उपमहानगरपालिकासँगको सहयोगमा साइबर सचेतनाबारे दुई दिने कार्यक्रम गरेको हो । पहिलो दिन सय बढी विद्यार्थी, शिक्षक लगायतका लागि गरिएको सचेतनाको दोस्रो दिन जनप्रतिनिधिहरुसँग अभिमुखीकरण गरिने आयोजक डटवर्क्सका प्रवन्ध निर्देशक अरशद कमल सिद्दीकीले जानकारी दिए । 

कार्यक्रम उद्घाटन सत्रमा बाँके प्रहरी प्रमुख प्रहरी उपरीक्षक राम प्रसाद घर्तीले बाँकेमा बढ्दो साइबर अपराध र जोगिनुपर्ने अवस्थाको आवश्यकताबारे आफ्ना धारणा राखेका थिए । सञ्चार साझेदार दैनिक नेपालगन्जका प्रधान सम्पादक झलक गैरेको अध्यक्षतमा भएको कार्यक्रममा नेपालगन्ज उपमहानगरपालिकाका प्रमुख प्रशासकीय अधिकृत रामहरि शर्मा, नेपालगन्ज-१८ का वडाध्यक्ष दीपक कुमार बर्मा लगायतले विषयगत धारणा राखेका थिए । 

शिक्षक विद्यार्थीहरुबीच अन्तरक्रियात्मक सचेतनका कार्यक्रममा विषय विज्ञ ई. अरशद कमल सिद्दीकी र बाँके प्रहरी महिला सेल प्रमुख प्रहरी निरीक्षक शिवा थापाले साइबर अपराधका बारेमा विभिन्न प्रस्तुतिकरण गरेका थिए । कार्यक्रमको सहजीकरण पत्रकार सन्ध्या गैरेले गरेकी थिइन् ।