प्रहरीले बोक्ने पेस्तोलसँग मिल्दोजुल्दो ६ थान नक्कली पेस्तोलसहित ३१ वर्षीय युवक पक्राउ

काठमाडौं । प्रहरीले  सुरक्षाकर्मीले बोक्ने पेस्तोल झै देखिने ६ थान नक्कली पेस्तोलसहित सिभिल मलबाट एक जनालाई पक्राउ गरेको छ।

जिल्ला प्रहरी परिसर काठमाडौंका अनुसार काठमाडौंको सुन्धारास्थान सिभिल मलको पाँचौँ तलामा रहेको द टोय स्टोरबाट प्रहरी वृत्त जनसेवाको टोलीले प्रहरीले बोक्ने अटोमेटिक पेस्तोल झै देखिने ६ थान नक्कली पेस्तोलसहित ३१ वर्षीय सुरज मगरलाई पक्राउ गरेको हो। साथै बरामद गरिएका ती नक्कली पेस्तोल भएता पनि बरामद पेस्तोलको  तौल प्रहरीले बोक्ने गरेको पेस्तोलसँग मिल्दोजुल्दो रहेको प्रहरीले जानकारी दिएको छ।

सन्तोषी श्रेष्ठले सञ्चालन गरेको उक्त स्टोरबाट काभ्रेको रोशी घर भएका सुरजलाई नक्कली हतियार आयात तथा बिक्री गरेको आरोपमा बिहीवार पक्राउ गरेर अनुसन्धान अगाडि बढाएको जिल्ला प्रहरी परिसर काठमाडौंले जानकारी दिएको छ।

काठमाडौं प्रहरीले दिएको जानकारी अनुसार सुरजले ती नक्कली पेस्तोल ५ सय १ रुपैयाँमा खरीद गरेर १४ हजार देखि १९ हजार रुपैयाँ सम्ममा बिक्री गरेको प्रहरीको प्रारम्भिक अनुसन्धानबाट खुल्न आएको हो।

पक्राउ परेका सुरजविरुद्ध ठगी तथा अभद्र व्यवहार सम्बन्धि मुद्दामा ५ दिनको म्याद लिएर प्रहरी वृत्त जनसेवाले थप अनुसन्धान अगाडि बढाएको जिल्ला प्रहरी परिसर काठमाडौंले जानकारी दिएको छ।