जेन-जी प्रदर्शन: कांग्रेसको मुख्य कार्यालय, शेरबहादुर देउवा र रमेश लेखकको घरमा आगजनी

काठमाडौँ । नेपाली कांग्रेसको सानेपास्थित कार्यालयमा जेनजी प्रदर्शनकारीले आगजनी सुरु गरेका छन् । बल्खुबाट अघि बढेको भीडले आगजनी गरेको हो । बल्खु क्षेत्रमा अहिले चर्को आन्दोलन भइरहेको रातोपाटीकर्मीहरुले बताएका छन् । 

निवर्तमान गृहमन्त्री रमेश लेखकको घरअगाडि प्रदर्शन र आगजनी भएको छ।

मंगलबार प्रदर्शनकारीले घर अगाडि टायर बालेर नाराबाजी पनि गरेका छन्। घरभित्रको सामान झिकेर प्रदर्शनकारीले जलाएका हुन्।प्रहरीले दुई सेल अश्रुग्यास पनि प्रहार गरेको थियो।

नेपाली कांग्रेसका सभापति शेरबहादुर देउवाको घरमा प्रदर्शनकारीले आगजनी गरेका छन् । मुख्य गेट फुटाएर घर भित्र प्रवेश गरेका प्रदर्शनकारीले घरभित्रै आगो लगाइदिएका हुन् ।

देउवाको घरबाट कालो धुवाँको मुस्लो उडेको छ । देउवा कहाँ छन् भन्ने खुलेको छैन ।

सोमबार जेनजीको प्रदर्शनको क्रममा १९ जनाको मृत्यु भएको थियो। मृत्यु भएपछि गृहमन्त्री लेखकले राजीनामा दिएका थिए।

प्रदर्शनकारीले काठमाडौंको नैकापस्थित कांग्रेस नेता एवम् पूर्वगृहमन्त्री रमेश लेखकको घरमा आगजनी समेत गरेका छन् ।