व्यावसायिकतासाथ कार्यक्षेत्रमा लाग्न सशस्त्र प्रहरी प्रमुख अर्यालको निर्देशन

काठमाडौं । सशस्त्र प्रहरी बल नेपाल प्रमुख आईजीपी राजु अर्यालले पदिय जिम्मेवारीलाई उच्च उत्तरदायित्वका साथ निर्वाह गर्दै राष्ट्र र संगठनले लिएको निर्दिष्ट लक्ष्य हासिल गर्न सकारात्मक सोच र पूर्ण व्यावसायिकताकासाथ कार्यक्षेत्रमा लाग्न निर्देशन दिएका छन्  ।

सशस्त्र प्रहरी बल नेपाल प्रधान कार्यालयमा आज आयोजित  दर्ज्यानी चिन्ह प्रदान गर्ने क्रममा आईजीपी अर्यालले सो निर्देशन दिएका हुन् ।

अर्यालले आगामी फागुन २१ गते हुने प्रतिनिधि सभा सदस्य निर्वाचनलाई स्वतन्त्र, निष्पक्ष, विश्वसनीय तथा भयरहित वातावरणमा सम्पन्न गर्न सशस्त्र प्रहरी कर्मचारीहरू मानसिक र सांगठनिक रूपमा पूर्ण तयारी अवस्थामा रहन निर्देशन दिए।उनले कठिन परिस्थितिमा समेत सशस्त्र प्रहरी कर्मचारीहरूले देखाएको साहस, अनुशासन र कर्तव्यपरायणताको प्रशंसा गर्दै भ्रष्टाचार तथा लैंगिक हिंसामा शून्य सहनशीलता, मानवअधिकारको संरक्षण र सम्वद्र्धनप्रति सधैं प्रतिबद्ध रहनुपर्नेमा जोड दिएका थिए। 

साथै, आपसी भाईचारा, बन्धुत्व, सद्भाव र सहयोगी भावनाका साथ पूर्ण व्यावसायिक भएर कर्तव्यपथमा खटिन अर्यालले निर्देशन दिएका हुन् । सोही अवसरमा आईजीपी अर्यालले पदोन्नति भएका अधिकृतहरूलाई हार्दिक बधाई दिँदै र लामो समय संगठनमा सेवा गरी अवकाश हुन लागेका अधिकृतहरूलाई नयाँ सामाजिक जीवनको स्वस्थ, सुखी र समृद्ध अध्यायको शुभकामना व्यक्त गरेका थिए।

गृहमन्त्रीस्तरको मंसिर २२ गतेको निर्णयअनुसार एसएसपीबाट डीआईजीमा कृष्णराज पाठक, एसपीबाट एसएपीमा समिक कुमार महर्जन तथा प्राविधिक एसपीबाट प्राविधिक एसएसपी पदमा डा. प्रविण नेपाल पदोन्नति भएका थिए।त्यसैगरी, अवकाशपूर्व दुई जना इन्स्पेक्टरमा विशेष बढुवा भएका छन् ।

कार्यक्रममा सशस्त्र प्रहरी परिवार महिला संघकी अध्यक्ष श्रीमती अनिता लामिछाने अर्याल, एआईजीहर्य नारायणदत्त पौडेल, बंशीराज दाहाल र गणेशबहादुर ठाडा मगर, डीआईजी लगायत सिनियर तथा जुनियर अधिकृत र विल्लादार जवानहरूको उपस्थिति रहेको सशस्त्र प्रहरी प्रधान कार्यालयले जनाएको छ।