नेपाली युवकलाई भारतको बिहारमा बन्धक बनाएर लाखौं फिरौती असुल्ने दुई जना पक्राउ

काठमाडौं । भारतको बिहार राज्यमा आकर्षक रोजगारीको झुटो आश्वासन दिएर नेपाली युवकलाई बन्धक बनाइ फिरौती असुल्ने गिरोहका दुई सदस्यलाई प्रहरीले पक्राउ गरेको छ।

सिरहा प्रहरीले पक्राउ गरेकाहरुमा सिरहाको कल्याणपुर नगरपालिका–७ भेडिया निवासी २६ वर्षीय सुरज मुखिया र लहान नगरपालिका–११ पररिया चोकका २२ वर्षीय प्रशान्त चौधरी रहेको प्रहरीले जानकारी दिएको छ।

प्रहरीका अनुसार अभियुक्तहरूले कल्याणपुर–७ का २८ वर्षीय रिशकेश कुमार मरिकलाई अनलाइन माध्यमबाट सम्पर्क गरी भारतको गयामा रहेको कन्स्ट्रक्सन कम्पनीमा राम्रो तलबसहितको काम दिलाइदिने प्रलोभन दिएका थिए। त्यसपछि गत पुस २० गते उनलाई भारतको बोधगया पुर्‍याई एक होस्टलमा राखेर बन्धक बनाइएको थियो।

त्यहाँ मरिकको मोबाइल फोन र शैक्षिक कागजात नियन्त्रणमा लिई उनलाई कोठामा थुनेर शारीरिक कुटपिट र मानसिक यातना दिइएको प्रहरीले जनाएको छ। ज्यान मार्ने धम्की दिँदै उनका परिवारसँग क्युआर कोड र बैंक खातामार्फत २ लाख १७ हजार २०० रुपैयाँ फिरौती असुल गरिएको थियो। साथै, पीडितसँग रहेको ३० हजार भारतीय रुपैयाँसमेत लुटिएको खुल्न आएको छ।

पछि तालिमको नाममा आपराधिक गतिविधिमा संलग्न गराउन खोजिएपछि मरिक मौका छोपी नेपाल फर्किन सफल भएका थिए। उनले माघ १५ गते जिल्ला प्रहरी कार्यालय सिरहामा उजुरी दिएपछि घटनाबारे अनुसन्धान अघि बढाइएको थियो।

अनुसन्धानकै क्रममा सुरज मुखियालाई माघ १६ गते कल्याणपुरबाट र प्रशान्त चौधरीलाई माघ १७ गते लहानबाट पक्राउ गरिएको जिल्ला प्रहरी कार्यालय सिरहाले जनाएको छ। सूचना अधिकारी तथा प्रहरी नायव उपरीक्षक रमेश बहादुर पालका अनुसार पक्राउ परेका दुवै जनामाथि शरीर बन्धकसम्बन्धी कसुरमा अदालतबाट म्याद थप गरी अनुसन्धान भइरहेको छ।