१३ वर्षीया विद्यार्थीलाई जबरजस्ती करणी गरेको आरोपमा शिक्षक पक्राउ

काठमाडौं । एक शिक्षकलाई आफ्नै विद्यार्थीलाई जबरजस्ती करणी गरेको आरोपमा प्रहरीले पक्राउ गरेको छ।

प्रहरीले सोलुखुम्बुको थुलुङ दुधकोसी गाउँपालिका–१ घर खोटाङको दिक्तेल इंग्लिस बोर्डिङ स्कुलका २४ वर्षीय शिक्षकलाई विद्यार्थीलाई जबरजस्ती करणीको आरोपमा पक्राउ गरेको जनाएको छ।

प्रहरीका अनुसार फागुन ९ गते गृहकार्य सिकाइदिने बहानामा १३ वर्षीया छात्रालाई आफ्नै कोठामा बोलाएर जबरजस्ती करणी गरेको आरोप छ। त्यसपछि पनि उनले बालिकालाई तीन घण्टासम्म कोठामा थुनेर राखेको पीडित परिवारको भनाइ छ।

पीडित विद्यार्थी रुँदै कोठामा पुगेपछि मात्रै अभिभावकले घटनाबारे जानकारी पाएका थिए। त्यसपछि पीडित विद्यार्थीका बुवा र काका पीडकको कोठामा पुगेर उनलाई नियन्त्रणमा लिई प्रहरीको जिम्मा लगाएका थिए।

विद्यार्थीको स्वास्थ्य परीक्षणपछि राति ११ बजे शिक्षकविरुद्ध जिल्ला प्रहरी कार्यालयमा जबरजस्ती करणीसम्बन्धी जाहेरी दर्ता गरिएको छ।

ती शिक्षकले गत मंसिरमा आयोजना गरिएको शैक्षिक भ्रमणमा गएदेखि नै छात्रालाई केही सिकाउने बहानामा पटक–पटक बोलाउने र अश्लील गतिविधि गर्ने गरेको पीडित परिवारको आरोप छ। प्रहरीले घटनाबारे थप अनुसन्धान भइरहेको जनाएको छ।