६४ वर्षीय माहाशेरको हत्या आरोपमा ७३ वर्षीय राम प्रसाद पक्राउ

काठमाडौं । ६४ वर्षीय पुरुषको हत्या आरोपमा प्रहरीले ७३ वर्षीय वृद्धलाई पक्राउ गरेको छ। 

उदयपुरको चौदण्डीगढी नगरपालिका-७ सिता पाईला टोल बस्ने ६४ वर्षीय माहाशेर राईको हत्या गरेको अभियोगमा सोही ठाउँ बस्ने ७३ वर्षीय राम प्रसाद राईलाई प्रहरीले पक्राउ गरेको जानकारी दिएको छ।

आपसी वादविवादको क्रममा राम प्रसादले धारिलो हतियार चक्कु प्रहार गर्दा माहाशेर गम्भीर घाइते भएको भन्ने खबर प्राप्त हुनासाथ इलाका प्रहरी कार्यालय बेल्टारबाट खटिएको प्रहरीले पक्राउ गरेको प्रहरी प्रधान कार्यालयले जनाएको छ। प्रहरी प्रधान कार्यालयका अनुसार  गम्भीर घाइते भएका माहाशेरको नगर अस्पताल बेल्टारमा उपचारको क्रममा मृत्यु भएको हो । 

हत्या अभियोगमा आइतबार राति  पक्राउ परेका राम प्रसादलाई उदयपुर प्रहरीले आज अदालतबाट म्याद थप गरेर आवश्यक अनुसन्धान गरिरहेको जनाएको छ।