नेपाल प्रहरीका वरिष्ठ सई सागर शमशेर जबरा निलम्बित, यस्तो छ कारण!

काठमाडौं । नेपाल प्रहरीका एक जना प्रहरी वरिष्ठ नायब निरीक्षक (वरिष्ठ सई) लाई संगठनविरुद्ध कार्य गरेको भन्दै निलम्बन प्रक्रिया अगाडि बढाइएको छ।

मधेश प्रदेश प्रहरी कार्यालय धनुषाले जिल्ला प्रहरी कार्यालय धनुषामा कार्यरत  वरिष्ठ सई  सागर शमसेर जबरामाथि गम्भीर आरोप लगाउँदै निलम्बन प्रक्रिया अघि बढाइएको जनाएको छ।

मधेस प्रदेश प्रहरी कार्यालयले जारी गरेको प्रेस विज्ञप्तिका अनुसार वरिष्ठ सई जबराले आफ्नै कार्यालय प्रमुख तथा  प्रहरी संगठनलाई बदनाम गराउने उद्देश्यले एक व्यापारीलाई फोन गरी बनावटी कथा तयार पारेर अडियो रेकर्ड गराएको र उक्त सामग्री सार्वजनिक मिडियामार्फत प्रसारण गर्न लगाएको आरोप छ।

वरिष्ठ सई जबराको उक्त कार्यलाई प्रहरी आचरण विपरीत तथा कानूनविपरीत मान्दै प्रहरी नियमावली २०७१ (संशोधन सहित) बमोजिम निलम्बन प्रक्रिया अघि बढाइएको प्रदेश कार्यालयले जनाएको छ। साथै, घटनाबारे आवश्यक अनुसन्धान तथा छानबिन कार्यसमेत जारी रहेको बताइएको छ।

मधेस प्रहरीले यस विषयमा सत्यतथ्य विवरण अनुसन्धानपछि सार्वजनिक गरिने स्पष्ट पार्दै भ्रामक तथा तथ्यहीन सूचनाको पछि नलाग्न र यस्ता सामग्रीमा विश्वास नगर्न आम सञ्चार माध्यम तथा नागरिकलाई अपिल गरेको छ।