सीमामा सशस्त्र प्रहरीको निगरानी कडा: बाँकेमा २ करोड ७३ लाख बढीको अवैध सामान नियन्त्रणमा

काठमाडौं  । सशस्त्र प्रहरी बल नेपाल नं.३० गण हेडक्वार्टर बागेश्वरी, बाँकेले आन्तरिक सुरक्षा सुदृढीकरणदेखि सीमामा हुने अवैध गतिविधि नियन्त्रणसम्म सक्रिय रूपमा खटिँदै करोडौँ रुपैयाँ बराबरको अवैध सामान नियन्त्रणमा लिन सफल भएको छ।

जिल्लाका विभिन्न नाका तथा संवेदनशील क्षेत्रहरूमा निरन्तर निगरानी र कारबाही सञ्चालन गर्दै सशस्त्र प्रहरी बाँकेले २ करोड ७३ लाख १८ हजार ७५८ रुपैयाँ बराबरको अवैध सामान बरामद गरेको सशस्त्र प्रहरी बाँकेले जनाएको छ।

सशस्त्र प्रहरीका अनुसार गत फागुन १६ गतेदेखि वैशाख १६ गतेसम्म बरामद गरिएको उक्त रकममध्ये २ करोड २९ लाख २० हजार २९६ रुपैयाँ बराबरको अवैध सामान भन्सार कार्यालयमा बुझाइएको छ। त्यस्तै, ४ लाख ९२ हजार ६९० रुपैयाँ बराबरको काठ बरामद गरी डिभिजन वन कार्यालयमा बुझाइएको जनाइएको छ।

यसैगरी, ३९ लाख ७९ हजार ७७२ रुपैयाँ बराबरको सामान नष्ट गरिएको छ भने बरामद गरिएको श्रोत नखुलेको ७ लाख २६ हजार रुपैयाँ सम्बन्धित निकायमा दाखिला गरिएको सशस्त्र प्रहरीले जनाएको छ।

सशस्त्र प्रहरीले जिल्लाको सीमा सुरक्षा, सीमा अपराध नियन्त्रण, मानव बेचबिखनविरुद्धको अभियान तथा विपद् व्यवस्थापनअन्तर्गत उद्धार कार्यलाई समान प्राथमिकताका साथ अघि बढाउँदै आएको छ। सीमामा हुने अवैध ओसारपसार नियन्त्रण गर्न दिनरात खटिएको टोलीले जोखिमपूर्ण अवस्थामा समेत सक्रिय भूमिका निर्वाह गर्दै आएको देखिन्छ।

वर्तमान समयमा सरकारले लागू गरेको एक सय रुपैयाँभन्दा माथिको सामान अनिवार्य रूपमा भन्सार गर्ने व्यवस्थाको प्रभावकारी कार्यान्वयनमा समेत सशस्त्र प्रहरीले सराहनीय भूमिका खेलिरहेको छ। नं.३० गणले आगामी दिनमा पनि सीमाक्षेत्रलाई सुरक्षित राख्न थप प्रभावकारी निगरानी तथा समन्वयात्मक कारबाहीलाई निरन्तरता दिने जनाएको छ।