बोक्सीको आरोपमा एकल महिलामाथि कुटपिट र अमानवीय व्यवहार, एक जना पक्राउ

काठमाडौं ।  एकल महिलामाथि गरिएको अमानवीय व्यवहारको घटनाले स्थानीयस्तरमा गम्भीर चिन्ता उत्पन्न गरेको छ। रौतहटको कटहरिया नगरपालिका  वडा नम्बर ९, डुमरिया टोलमा शनिबार भएको उक्त घटनामा ५५ वर्षीया महिलालाई ‘बोक्सी’को आरोप लगाउँदै कुटपिट गर्नुका साथै जबरजस्ती मलमुत्र खुवाइएको प्रहरीले जनाएको छ।

घटनामा संलग्न रहेको आरोपमा ३० वर्षीय शंकर माझीलाई प्रहरीले पक्राउ गरेको छ। उनी स्थानीय फुदेनी माझीका छोरा हुन्। प्रहरीका अनुसार केही स्थानीय व्यक्तिहरू, जसमा गौरी साह कलवारसमेत रहेका छन्, महिलामाथि बालकलाई बिरामी बनाएको आरोप लगाउँदै दुर्व्यवहारमा संलग्न भएका थिए।

पीडित महिलाले  इलाका प्रहरी कार्यालय गरुडामा उजुरी दर्ता गराएकी थिइन्। त्यसलगत्तै प्रहरी टोलीले खोजी अभियान सञ्चालन गर्दै मुख्य आरोपितमध्येका माझीलाई नियन्त्रणमा लिएको हो।

जिल्ला प्रहरी कार्यालय रौतहटका सूचना अधिकारी तथा प्रहरी नायव उपरीक्षक बिष्णु प्रदिप बस्यालले घटनामा संलग्न अन्य व्यक्तिहरूको खोजी भइरहेको जानकारी दिएका छन्। पक्राउ परेका व्यक्तिमाथि थप अनुसन्धान भइरहेको र कानुनी प्रक्रिया अघि बढाइएको प्रहरीले जनाएको छ।

यस घटनाले अन्धविश्वासका कारण समाजमा अझै पनि महिलामाथि हुने हिंसाका घटनाहरू चुनौतीकै रूपमा रहेको संकेत गरेको छ।