भारतीय एम्बुलेन्समा गाँजा तस्करी, झण्डै डेढ क्विन्टल गाँजासहित दुई भारतीय पक्राउ

काठमाडौं । प्रहरीले ठूलो परिमाणमा गाँजासहितको भारतीय नम्बर प्लेटको एम्बुलेन्स नियन्त्रणमा लिएको छ। सो क्रममा एम्बुलेन्समा रहेका दुई जनालाई पनि पक्राउ गरिएको प्रहरीले जनाएको छ।

प्रहरीका अनुसार सुनसरीको बराहक्षेत्रबाट प्रहरीले बराहक्षेत्र नगरपालिका–२ पुल्ठेगौंडा क्षेत्रबाट बीआर ०७ पीसी ४७६५ नम्बरको एम्बुलेन्स जाँच गर्ने क्रममा प्लास्टिकका बोरामा लुकाइराखिएको करिब १४८ किलो गाँजा फेला परेको हो।

जिल्ला प्रहरी कार्यालय सुनसरीका अनुसार पक्राउ पर्नेहरूमा भारतको बिहार राज्यस्थित सुपोल जिल्ला वीरपुरका १८ वर्षीय धर्मेन्द्रकुमार यादव र २१ वर्षीय मोहमद सदाम रहेका छन्।

प्रारम्भिक अनुसन्धानका क्रममा एम्बुलेन्स प्रयोग गरेर लागूऔषध भारततर्फ लैजान खोजिएको आशंका गरिएको छ। घटनाबारे थप अनुसन्धान जारी रहेको प्रहरीले जनाएको छ।