जग्गा खरिदका लागि आएका दुई जनामाथि गोली प्रहार गरी लुटपाट घटनामा पाँच जना पक्राउ

काठमाडौं । जग्गा खरिदका लागि आएका दुई जनामाथि गोली प्रहार गरी नगद लुटपाट गर्ने घटनामा संलग्न पाँच जनालाई प्रहरीले चार महिनापछि नियन्त्रणमा लिएको छ।

२०८२ माघ ४ गते सिरहाको लहान नगरपालिका–१० निवासी ४७ वर्षीय मोहम्मद सदाम र ६० वर्षीय ताहिर मियाँ सप्तरीको खड्क गाउँपालिका–५ खरचुहिया पुगेका बेला उनीहरूलाई समूहले बन्धक बनाएर गोली प्रहार गर्दै रकम लुटेको थियो। घटना लगत्तै आरोपीहरू फरार भएका थिए।

जिल्ला प्रहरी कार्यालय सप्तरी तथा इलाका प्रहरी कार्यालय कडरबोनाबाट खटिएको टोलीले वैशाख २३ र २४ गते पाँच जनालाई पक्राउ गरेको हो। पक्राउ पर्नेमा खड्क नगरपालिका–६ खरचुहियाकी ४२ वर्षीया मिना खातुन, रुपनी गाउँपालिका–५ का ४३ वर्षीय हजरत मियाँ, राजगढ गाउँपालिकाका ४५ वर्षीय मंजिद मियाँ, खड्क नगरपालिका–६ बिरपुरका ४८ वर्षीय मुमताज मियाँ र सुरुङ्गा नगरपालिका–३ का ३५ वर्षीय उपेन्द्र मोची रहेका छन्।

सप्तरीका प्रहरी प्रमुख एसपी गौतम केसीका अनुसार पक्राउ परेकामाथि इलाका प्रहरी कार्यालय कडरबोनाले अदालतबाट पाँच दिनको म्याद लिएर अनुसन्धान अघि बढाएको छ।

प्रहरीले उनीहरूमाथि अपहरण, शरीर बन्धक तथा ज्यान मार्ने उद्योगसम्बन्धी कसुरमा अनुसन्धान जारी रहेको जनाएको छ।