विभिन्न स्थानबाट लागुऔषधसहित १३ जना नेपाल प्रहरीको नियन्त्रणमा

काठमाडौं । देशका विभिन्न स्थानमा नेपाल प्रहरीले लागुऔषधसहित १३ जनालाई पक्राउ गरेको छ।

सुर्खेतको वीरेन्द्रनगर नगरपालिका–१२ शिवनगर टोलबाट प्रहरीले १ ग्राम १७० मिलिग्राम ब्राउन सुगर सहित २ जनालाई पक्राउ गरेको छ । पक्राउ पर्नेमा ३५ वर्षीया कौशिला कालुङ् र ३९ वर्षीया निशा वली रहेका छन् । लागूऔषध नियन्त्रण ब्यूरो शाखा कार्यालय सुर्खेतबाट खटिएको प्रहरीले कौशिलाको घर तलासी गर्दा उक्त पदार्थ फेला पारेको हो ।

कैलालीको धनगढी उपमहानगरपालिका–४ बसपार्क नजिकबाट ६० मिलिग्राम ब्राउन सुगर सहित कञ्चनपुर पुनर्वास नगरपालिका–११ बस्ने १९ वर्षीय निशान ढकालसहित २ जनालाई प्रहरीले पक्राउ गरेको छ ।

यसैगरी कैलालीकै बर्दगोरिया गाउँपालिका–१ झगडपुरबाट १०० मिलिग्राम खैरो हेरोइन सहित ३१ वर्षीय गणेश मल्ल पक्राउ परेका छन्।

 यसैगरी कञ्चनपुरको बेलडाँडी गाउँपालिका–२ बाट १ ग्राम ६ मिलिग्राम ब्राउन सुगर सहित ३ जना पक्राउ परेका छन् । पक्राउ पर्नेमा २९ वर्षीय अमित चौधरी, २७ वर्षीय शेखर चौधरी र २४ वर्षीय सुशिल डगौरा रहेका छन् ।

यस्तै, कञ्चनपुरको बेदकोट नगरपालिका–१ चम्पापुरबाट ५ ग्राम ४०० मिलिग्राम खैरो हेरोइन सहित १८ वर्षीय एक किशोर पक्राउ परेका छन् । घटनामा संलग्न फरार १ जनाको खोजी भइरहेको प्रहरीले जनाएको छ ।

मोरङको विराटनगर महानगरपालिका–१६ बाट नियन्त्रित लागूऔषध फेनारगन ४ एम्पुल, डाईजेपाम ४ एम्पुल र लुपिजेसिक ४ एम्पुल सहित ३१ वर्षीय कलाम मिया पक्राउ परेका छन् ।

कास्कीको पोखरा महानगरपालिका–२७ डाँडाकोनाकबाट बुप्रेनोर्फिन ५ एम्पुल, फेनारगन ५ एम्पुल र डाईजेपाम १ एम्पुल सहित २३ वर्षीया सुस्मिता गुरुङ पक्राउ परेकी छन् । प्रहरीले उनी सवार ग।१० प २४३१ नम्बरको स्कुटर समेत नियन्त्रणमा लिएको छ ।

सुनसरीको इटहरी उपमहानगरपालिका–१९ ब्रहमपुरबाट २४ ग्राम ४४० मिलिग्राम खैरो हेरोइन र नगद १९ हजार ९८० रुपैयाँ सहित ३८ वर्षीय चक्रबहादुर जिमी पक्राउ परेका छन् । प्रहरीले उनले प्रयोग गरेको को।३९ प ३१२३ नम्बरको मोटरसाइकल समेत बरामद गरेको छ।

त्यसैगरी ललितपुर महानगरपालिका–९ सनराइजहोम स्नुकर हाउसबाट ट्रामाडोल २० ट्याब्लेट सहित २३ वर्षीय अनिस लामा पक्राउ परेका छन् ।

घटनाका सम्बन्धमा  प्रहरीले थप अनुसन्धान गरिरहेको जनाएको छ।