शेरबहादुर देउवा र आरजु राणालाई पक्राउ नगर्न सर्वोच्चको आदेश

काठमाडौँ । सर्वोच्च अदालतले पूर्वप्रधानमन्त्री शेरबहादुर देउवा र उनकी पत्नी पूर्व परराष्ट्रमन्त्री आरजु राणा देउवालाई पक्राउ नगर्न अन्तरिम आदेश दिएको छ।

आज सर्वोच्चका न्यायाधीश महेश शर्मा पौडेल र नित्यानन्द पाण्डेयको संयुक्त इजलासले देउवा दम्पतीविरुद्ध जारी भएको पक्राउ प्रक्रियालाई रोक्ने आदेश जारी गरेको हो। यसअघि अदालतले दुवै पक्षलाई अन्तरिम आदेश आवश्यक भएरनभएको विषयमा छलफलका लागि उपस्थित हुन निर्देशन दिएको थियो।

सम्पत्ति शुद्धीकरण अनुसन्धान विभागले उनीहरूविरुद्ध काठमाडौँ जिल्ला अदालतबाट पक्राउ अनुमति लिएको थियो। त्यसविरुद्ध सर्वोच्च अदालत पुगेका देउवा पक्षले आफ्नो मुद्दा विशेष अदालतको क्षेत्राधिकारभित्र पर्ने दाबी गरेका छन्। साथै, काठमाडौँ जिल्ला अदालतले अधिकार क्षेत्रभन्दा बाहिर गएर पक्राउ पूर्जी जारी गरेको जिकिर पनि रिटमा उल्लेख गरिएको छ।

देउवा पक्षले अनुसन्धानमा पूर्ण सहयोग गर्ने, सम्पत्तिको स्रोत खुलाउन तयार रहेको तथा पक्राउ गर्नुपर्ने कुनै आवश्यक अवस्था नरहेको दाबी गरेको छ।

केही समयअघि हङकङ पुगेका देउवा दम्पती हालसम्म नेपाल फर्किएका छैनन्। उनीहरूविरुद्ध रेड कर्नर नोटिस जारी गर्ने प्रक्रिया अघि बढाइए पनि इन्टरपोलले हालसम्म त्यस्तो नोटिस जारी गरेको छैन।