'किङ अफ भगवानपुर' लगायतका ग्याङ्ग बनाएर आतंक मच्चाउने २५ युवा पक्राउ

काठमाडौं । विभिन्न समूह तथा ग्याङ्गको नाम प्रयोग गरी समाजमा त्रास फैलाएर आतंक मच्चाउने गतिविधिमा संलग्न रहेको आरोपमा २५ जना युवालाई प्रहरीले  पक्राउ  गरेको छ।

प्रहरीका अनुसार ‘किङ अफ बालान’, ‘किङ अफ भगवानपुर’, ‘किङ अफ लहान’ र ‘किलर्स ब्रदर’ लगायतका नाममा टिकटक, फेसबुक तथा अन्य सामाजिक सञ्जालमा समूह गठन गरी गालीगलौज, धम्की तथा उक्साहटपूर्ण सामग्री सार्वजनिक गर्ने कार्य भइरहेको थियो।

यस्ता समूहमा आबद्ध युवाहरूले ट्राफिक नियमको बेवास्ता गर्दै हेल्मेट नलगाई, आवश्यक कागजात बिना तथा नम्बर प्लेट नभएका मोटरसाइकल प्रयोग गरी राजमार्ग क्षेत्रमा हुलहुज्जत गर्ने र सार्वजनिक शान्तिमा असर पुर्‍याउने गतिविधि गर्दै आएको जिल्ला प्रहरी कार्यालय   सिरहाको भनाइ छ।

सिरहा–चोहर्वा सडकखण्डमा नियमित सवारी जाँचका क्रममा उनीहरूलाई फेला पारिएको प्रहरीले जनाएको छ। पक्राउ परेकामध्ये १२ जना सप्तरीको बलान बिहुल गाउँपालिकाका, २ जना सिरहाको लहान नगरपालिकाका, ६ जना विष्णुपुर गाउँपालिकाका र ५ जना भगवानपुर गाउँपालिकाका छन्।

प्रहरीले उनीहरूको प्रयोगमा रहेका २१ वटा मोटरसाइकल समेत नियन्त्रणमा लिएको छ। पक्राउ परेका सबैलाई सिरहा प्रहरीको हिरासतमा राखेर घटनाबारे थप अनुसन्धान अघि बढाइएको जिल्ला प्रहरी कार्यालय सिरहाले जनाएको छ।