ट्राफिक प्रहरीले फेला पार्‍यो चोरी भएका ५१ वटा स्कुटर र मोटरसाइकल: धनीलाई बुझाए एसएसपी काफ्लेले

काठमाडौँ । ट्राफिक प्रहरीले विभिन्न स्थानबाट चोरी भएका दर्जनौं मोटरसाइकल फेला पारेर सवारी धनीलाई बुझाएको छ।

काठमाडौँ उपत्यकाका विभिन्न क्षेत्रबाट  चोरी भएका मोटरसाइकल र स्कुटर खोजी गर्ने अभियानअन्तर्गत ट्राफिक प्रहरीले पछिल्लो एक महिनामा ५१ वटा दुईपांग्रे सवारीसाधन फेला पारी सम्बन्धित सवारीधनीलाई हस्तान्तरण गरेको जनाएको छ।

आज आयोजित कार्यक्रममा उपत्यका ट्राफिक प्रहरी कार्यालयका एसएसपी सुरेश काफ्लेले अनुसन्धान र खोजतलासका क्रममा फेला परेका सवारीसाधन सम्बन्धित धनीलाई जिम्मा लगाएका हुन्।

एसएसपी काफ्लेका अनुसार चोरी भएका सवारीसाधनको खोजीलाई प्रभावकारी बनाउन विशेष अभियान सञ्चालन गरिएको छ। यही अभियानका क्रममा एक महिनाभित्र ३५ वटा मोटरसाइकल र १६ वटा स्कुटर फेला पार्न सफलता मिलेको उनले जानकारी दिए।

ट्राफिक प्रहरीले चोरी भएका सवारीसाधनको खोजी तथा नियन्त्रण अभियानलाई आगामी दिनमा अझ प्रभावकारी बनाउँदै लैजाने जनाएको छ।