कालिकोटमा पहिरोले पानीघट्ट पुरिँदा दुई जनाको मृत्यु, पिठो पिस्न गएका थिए उनीहरु

कालीकोट । कालिकोटको सान्नीत्रिवेणी गाउँपालिका–६ काप्रिखोलामा पहिरोले पानीघट्ट पुरिँदा दुई जनाको मृत्यु भएको छ।

नेपाल प्रहरीका अनुसार आज पिठो पिस्न पानीघट्ट पुगेका स्थानीय ४६ वर्षीय मन्दिर साउद र ७६ वर्षीय लालबहादुर साउद घट्टभित्र रहेका बेला माथिबाट आएको पहिरोले पुरेका थिए। पहिरोमा परेका दुवै जनाको घटनास्थलमै मृत्यु भएको प्रहरीले जनाएको छ।

घटनाको सूचना प्राप्त भएपछि प्रहरी चौकी मेहलमुडीबाट खटिएको प्रहरी टोलीले स्थानीयको सहयोगमा उद्धार कार्य सञ्चालन गरेको थियो। उद्धारका क्रममा दुवै जनालाई पहिरोबाट बाहिर निकालिए पनि उनीहरूको मृत्यु भइसकेको प्रहरीले जनाएको छ।

पहिरोका कारण पानीघट्टको आधा भागसमेत क्षतिग्रस्त भएको छ। घटनाबारे आवश्यक अनुसन्धान भइरहेको  प्रहरीले जनाएको छ।