विद्युत् प्राधिकरणको स्कारपियो दुर्घटनामा चालक र कर्मचारीको मृत्यु, एक जना घाइते

काठमाडौं । नेपाल विद्युत् प्राधिकरणको स्कारपियो दुर्घटनामा दुई जनाको मृत्यु भएको छ।

विद्युत् प्राधिकरण धरान कार्यालयको  स्कारपियो गाडी  धरान–इटहरी कोशी लोकमार्गअन्तर्गत इटहरी उपमहानगरपालिका–२० स्थित सेउती पुल नजिक गए राति दुर्घटना भएको प्रहरीले जनाएको छ।

धरानबाट इटहरीतर्फ जाँदै गरेको बा१ञ १६५१ नम्बरको स्कारपियो गाडी गए राति करिब साढे ११ बजे दुर्घटना भएको जिल्ला प्रहरी कार्यालय सुनसरीका सूचना अधिकारी प्रहरी नायब उपरीक्षक चन्द्रबहादुर खड्काले जानकारी दिए।

दुर्घटनामा परी गाडी चालक धरान–१३ का बिर्ख राई र नेपाल विद्युत् प्राधिकरणका कर्मचारी धरान–१६ का सुमन आचार्य गम्भीर घाइते भएका थिए। दुवैलाई उपचारका लागि धरानस्थित बिपी कोइराला स्वास्थ्य विज्ञान प्रतिष्ठान लगिएकोमा राति करिब १२ः४५ बजे चिकित्सकले मृत घोषणा गरेको सूचना अधिकारी खड्काले बताए ।

दुर्घटनामा घाइते भएका धरान २० का पवन राईको बिपी प्रतिष्ठानमा उपचार भइरहेको छ। घटनाबारे अनुसन्धान भइरहेको जिल्ला प्रहरी कार्यालय सुनसरीले जनाएको छ । रासस।