जरिवानाको २५ प्रतिशत रकम ट्राफिकको खल्तीमा होइन, सिधै सरकारी राजस्वमा जान्छ: नेपाल प्रहरी

काठमाडौं । नेपाल प्रहरीले ट्राफिक प्रहरीले सवारी नियम उल्लंघनबापत काटिएको जरिवानाको २५ प्रतिशत विशेष भत्ता पाउने भन्ने दाबी पूर्ण रूपमा भ्रामक र तथ्यहीन भएको स्पष्ट पारेको छ।

प्रहरी प्रधान कार्यालय, प्रहरी महानिरीक्षकको सचिवालयले मंगलबार  विज्ञप्ति जारी गर्दै केही सञ्चार माध्यम र सामाजिक सञ्जालमा ट्राफिक प्रहरीले जरिवानाबाट अतिरिक्त सुविधा प्राप्त गर्ने भन्ने आशयका समाचार तथा टिप्पणीहरू प्रकाशित भएपछि त्यसप्रति गम्भीर ध्यानाकर्षण भएको जनाएको हो।

प्रहरी प्रधान कार्यालयका अनुसार ट्राफिक नियम उल्लंघन गरेबापत उठाइने सम्पूर्ण जरिवाना रकम सिधै नेपाल सरकारको राजस्व खातामा जम्मा हुने कानुनी व्यवस्था छ। उक्त जरिवानाबाट ट्राफिक प्रहरी कर्मचारीले कुनै पनि प्रकारको अतिरिक्त शुल्क, कमिसन वा विशेष भत्ता प्राप्त गर्ने कानुनी व्यवस्था नरहेको नेपाल प्रहरीले स्पष्ट गरेको छ।

नेपाल प्रहरीले तथ्य पुष्टि नगरी अनुमानका आधारमा समाचार वा टिप्पणी प्रकाशित तथा प्रसारण गर्दा आम नागरिकमा भ्रम फैलिने, सार्वजनिक संस्थाप्रतिको विश्वासमा नकारात्मक असर पर्ने तथा प्रशासनिक प्रक्रियालाई अनावश्यक विवादमा तान्ने अवस्था सिर्जना हुन सक्ने जनाएको छ।

साथै, अपुष्ट, भ्रामक र तथ्यहीन सूचनाको पछि नलाग्न सबै सञ्चार माध्यम, सामाजिक सञ्जाल प्रयोगकर्ता तथा सरोकारवालासँग अनुरोध गर्दै समाचार वा सूचना प्रकाशनरप्रसारण गर्नुअघि सम्बन्धित निकायबाट तथ्य पुष्टि गरेर मात्र जिम्मेवारीपूर्वक सूचना सम्प्रेषण गर्न नेपाल प्रहरीले आग्रह गरेको छ।