तराई–मधेशमा बढ्दो तनावपछि प्रहरीका १५ उच्च अधिकृत फिल्डमा (को कहाँ खटिए)?

काठमाडौं । तराई–मधेशका विभिन्न जिल्लामा पछिल्ला दिनमा देखिएको सुरक्षा चुनौती र तनावपूर्ण अवस्थालाई मध्यनजर गर्दै नेपाल प्रहरीले एसएसपीदेखि एआईजीसम्मका १५ जना वरिष्ठ प्रहरी अधिकृतलाई विशेष जिम्मेवारीसहित परिचालन गरेको छ।

प्रहरी प्रधान कार्यालयका अनुसार उच्च अधिकृतहरूलाई प्रदेश तथा जिल्ला प्रहरी कार्यालयसँग प्रत्यक्ष समन्वय गर्दै सुरक्षा व्यवस्थापनलाई प्रभावकारी बनाउन, स्रोत–साधनको परिचालन, सुरक्षा अवस्थाको मूल्यांकन, सूचना संकलन तथा विश्लेषण, सुरक्षा रणनीति कार्यान्वयन र आवश्यकताअनुसार फिल्डमै खटिएर काम गर्ने जिम्मेवारी दिइएको छ।

सुनसरीको देवानगञ्ज गाउँपालिका–स्थित कप्तानगञ्जमा साउन १० गते दुई समुदायबीच भएको विवादका क्रममा सुरक्षाकर्मीको गोली लागेर एक जनाको मृत्यु भएपछि तराई–मधेशका मोरङ, सुनसरी, सिरहा, धनुषालगायत जिल्लामा तनाव फैलिएको थियो। त्यसयता केही स्थानमा आगजनी, तोडफोडका घटना भएका छन् भने स्थानीय प्रशासनले कर्फ्यु आदेश जारी गर्नुका साथै नेपाली सेनासमेत परिचालन गरिएको छ। विभिन्न घटनामा हालसम्म तीन जनाको ज्यान गएको छ।

यही सुरक्षा अवस्थालाई दृष्टिगत गर्दै प्रहरी प्रधान कार्यालयले वरिष्ठ अधिकृतहरूलाई प्रभावित क्षेत्र तथा रणनीतिक जिल्लामा खटाएको जनाएको छ।

खटाइएका अधिकृतहरूको जिम्मेवारी यसप्रकार छ-

एआईजी सिद्धीविक्रम शाह – बाँके

एआईजी हिमालय कुमार श्रेष्ठ – मधेश प्रदेश

एआईजी उमा प्रसाद चतुर्वेदी – कपिलवस्तु

एआईजी ईश्वर कार्की – कोशी प्रदेश तथा सुनसरी

डीआईजी दिनेश कुमार आचार्य – सिरहा

डीआईजी अबि नारायण काफ्ले – सप्तरी

एसएसपी गोपालचन्द्र भट्टराई – सर्लाही

एसएसपी सोमेन्द्र सिंह राठौर – पर्सा

एसएसपी दीप शम्शेर जबरा – रौतहट

एसएसपी नवराज अधिकारी – चितवन

एसएसपी कृष्णप्रसाद पंगेनी – महोत्तरी

एसएसपी होबिन्द्र बोगटी – बारा

एसएसपी ज्ञानेन्द्रप्रसाद फुयाँल – मोरङ

एसएसपी भुवनेश्वर तिवारी – धनुषा

एसएसपी अमरेन्द्रबहादुर सिंह – मधेश प्रदेश