तीन महिनामा देशभरबाट लागूऔषध कारोबारमा संलग्न ३३ सय बढी पक्राउ

काठमाडौं । नेपाल प्रहरीले गत वैशाख १ गतेदेखि असार मसान्तसम्म देशभरबाट लागूऔषध कारोबारमा संलग्न ३ हजार ३ सय १६ जनालाई पक्राउ गरेको छ।

प्रहरी प्रधान कार्यालयका अनुसार पक्राउ परेकामध्ये काठमाडौं उपत्यकाबाट ५ सय ११ जना, कोशी प्रदेशबाट ७ सय १३ जना, मधेश प्रदेशबाट २ सय ५५ जना, बागमती प्रदेशबाट ४ सय २८ जना, गण्डकी प्रदेशबाट १ सय ८९ जना, लुम्बिनी प्रदेशबाट ५ सय ११ जना, कर्णाली प्रदेशबाट १ सय २१ जना, सुदूरपश्चिम प्रदेशबाट ४ सय ५७ जना तथा लागूऔषध नियन्त्रण ब्यूरोबाट १ सय ३१ जना रहेका छन्।

उक्त अवधिमा प्रहरीले ८ हजार ६ सय ३२ किलो ६ सय ८३ ग्राम ६ सय ९१ मिलिग्राम गाँजा, ३१ किलो १ सय ६८ ग्राम ६ सय ७१ मिलिग्राम चरेस, ५ किलो ७ सय ९२ ग्राम १ सय २० मिलिग्राम कोकिन, ११ किलो ८ सय ९४ ग्राम १ सय ६५ मिलिग्राम हेरोइन, १ सय २७ किलो १ सय ६० ग्राम १ सय ३७ मिलिग्राम अफिम तथा २१ किलो ६ सय ४६ ग्राम पोलेन बरामद गरेको प्रहरी प्रधान कार्यालयले जनाएको छ।

यसैगरी, प्रहरीले ९ लाख ७६ हजार ६ सय २६ ट्याब्लेट ट्रामाडोल, १९ हजार १ सय १० ट्याब्लेट नाइट्राभेट, ३३ हजार ३ सय ९ ट्याब्लेट स्पास्मो, ९ हजार ५ सय ५३ एम्पुल डाईजेपाम, १६ हजार ६ सय ५४ एम्पुल फेनारगन तथा ८ हजार १ सय ३० एम्पुल बुप्रेनोर्फिन समेत बरामद गरेको प्रहरीले जनाएको छ।

नेपाल प्रहरीले लागूऔषध कारोबार तथा अन्य आपराधिक गतिविधिमा संलग्न व्यक्तिलाई कानुनी दायरामा ल्याउन देशभरका प्रहरी कार्यालयमार्फत नियन्त्रण तथा कारबाहीलाई प्राथमिकताका साथ अघि बढाइरहेको जनाएको छ। साथै, समुदाय–प्रहरी साझेदारी कार्यक्रमअन्तर्गत लागूऔषधको उत्पादन, ओसारपसार तथा प्रयोगबाट व्यक्ति र समाजमा पर्ने नकारात्मक प्रभावबारे जनचेतनामूलक कार्यक्रमहरू पनि सञ्चालन गर्दै आएको प्रहरीले जनाएको छ।