पेट्रोल बोकेको ट्याङ्कर पल्टिएपछि आगलागी, पूर्ण रूपमा जलेर नष्ट

काठमाडौं  । रौतहटको गुजरा नगरपालिका–३ धनसार पुल नजिक पूर्व–पश्चिम राजमार्गमा पेट्रोल बोकेको ट्याङ्कर दुर्घटनामा परेपछि आगलागी हुँदा पूर्ण रूपमा जलेर नष्ट भएको छ।

आज बिहान करिब ५ः३० बजे बाराको अमलेखगञ्जबाट सर्लाहीतर्फ पेट्रोल बोकेर जाँदै गरेको मधेस प्रदेश ०३–००१ ख ७८११ नम्बरको ट्याङ्कर सडकमा अचानक आएको मृगलाई जोगाउने प्रयास गर्दा चालकले नियन्त्रण गुमाई सडकको दाहिने किनारमा पल्टिएको प्रहरीले जनाएको छ।

जिल्ला प्रहरी कार्यालय रौतहटका प्रवक्ता डीएसपी वसन्त गौतमका अनुसार दुर्घटनापछि ट्याङ्करमा आगलागी भएको थियो। घटनाको जानकारी प्राप्त हुनासाथ इलाका प्रहरी कार्यालय चन्द्रनिगाहपुरबाट डीएसपी सत्यनारायण थापाको नेतृत्वमा १० जना तथा जिल्ला ट्राफिक प्रहरी कार्यालय चपुरबाट इन्स्पेक्टर राजेन्द्र थापा मगरको नेतृत्वमा ५ जना गरी १५ सदस्यीय प्रहरी टोली घटनास्थलमा परिचालन गरिएको थियो भने दुर्घटनाबारे जानकारी पाएपछि आवश्यक उद्धार तथा आगलागी नियन्त्रणको लागि सशस्त्र प्रहरी बल नेपाल विपद् व्यवस्थापन सुरक्षा वेश निजगढ बारा र  सुरक्षा बेश सन्तपुर रौतहटबाट टोली खटिएको थियो ।

उक्त आगलागीबाट मानवीय क्षति केही नभएको र तेल ट्याङ्कर पुर्ण रुपमा जलेकोे बताईएको छ ।

चन्द्रपुर नगरपालिका र बाराको निजगढ नगरपालिकाबाट पुगेका दमकलको सहयोगमा बिहान करिब ६ः५० बजे आगो पूर्ण रूपमा नियन्त्रणमा ल्याइएको प्रहरीले जनाएको छ।

दुर्घटनाबाट ट्याङ्कर पूर्ण रूपमा जलेर नष्ट भए पनि कुनै मानवीय क्षति नभएको प्रहरीले जनाएको छ। आगलागीका कारण केही समय सतर्कता अपनाइए पनि पूर्व–पश्चिम राजमार्गमा सवारी आवागमन अहिले सामान्य रूपमा सञ्चालन भइरहेको छ।

ट्याङ्कर चालक बारा जिल्लाको सिमरा उपमहानगरपालिका–११ का २५ वर्षीय समिर गुरुङलाई ट्राफिक प्रहरी कार्यालय चपुरको नियन्त्रणमा राखिएको छ। घटनाबारे थप अनुसन्धान भइरहेको जिल्ला प्रहरी कार्यालय रौतहटले जनाएको छ।