मोटरको स्विच अन गर्दा करेन्ट लागेर २३ वर्षीया महिलाको मृत्यु

काठमाडौं । करेन्ट लागेर एक महिलाको मृत्यु भएको छ। मृत्यु हुनेमा महोत्तरीको एकडारा नगरपालिका–१ निवासी रविन्द्र महतोकी २३ वर्षीया पत्नी पुनिताकुमारी महतो रहेकी छन्।

प्रहरीका अनुसार जनकपुरधाम उपमहानगरपालिका–१७ तेतरियास्थित भिनाजु सन्देश महतोको घरमा पुगेकी पुनितालाई आइतबार बिहान मोटरको स्विच चलाउने क्रममा करेन्ट लागेको थियो। करेन्ट लागेपछि गम्भीर घाइते भएकी उनलाई तत्काल उपचारका लागि प्रादेशिक अस्पताल जनकपुरधाम लगिएको थियो।

तर अस्पताल पुर्‍याएलगत्तै चिकित्सकले जाँच गर्दा दिउँसो करिब १२ बजे पुनितालाई मृत घोषणा गरेका थिए। उनलाई बिहान करिब ११ बजे करेन्ट लागेको जिल्ला प्रहरी कार्यालय धनुषाले जनाएको छ।

मृतकको शव प्रादेशिक अस्पताल जनकपुरधाममै राखिएको छ। घटनाको कारण तथा अन्य विवरणबारे प्रहरीले थप अनुसन्धान गरिरहेको जनाएको छ।