विनाशकारी बाढी प्रभावित क्षेत्रमा ७ हजारभन्दा बढी सुरक्षाकर्मी परिचालन

काठमाडौँ । भोटेकोशी नदीमा आएको बाढीपछि प्रभावित क्षेत्रमा खोज तथा उद्धार र राहत व्यवस्थापनका लागि ७ हजार ४ सय १५ जना सुरक्षाकर्मी परिचालन गरिएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका उपसचिव रामबहादुर केसीका अनुसार उद्धार तथा राहत कार्यमा नेपाल प्रहरीका ३ हजार ३ सय १८, नेपाली सेनाका २ हजार ३ सय ५५ र सशस्त्र प्रहरी बल नेपालका १ हजार ७ सय ४२ जना सुरक्षाकर्मी खटिएका छन् ।

प्राधिकरणका अनुसार बाढी प्रभावित क्षेत्रमा हेलिकोप्टरमार्फत समेत खोज तथा उद्धारलाई तीव्र पारिएको छ । हालसम्म २ सय ३९ वटा हेलिकोप्टर उडानमार्फत खोज तथा उद्धारको काम भएको छ । तीमध्ये नेपाली सेनाका हेलिकोप्टरबाट २ सय ११ र निजी क्षेत्रका हेलिकोप्टरबाट २८ वटा उडान गरिएको प्राधिकरणले जनाएको छ ।

प्रभावित क्षेत्रमा सुरक्षाकर्मी तथा अन्य निकायको टोलीले खोज तथा उद्धारसँगै राहत वितरण र व्यवस्थापनको कामलाई निरन्तरता दिइरहेका छन् ।

तिब्बततर्फबाट भोटेकोशी नदी हुँदै आएको बाढी रसुवागढी, टिमुरे र स्याफ्रुबेंसी हुँदै त्रिशूली नदीमा मिसिएपछि रसुवा, नुवाकोट, धादिङ, गोरखा र चितवनका त्रिशूली नदी आसपासका बस्ती उच्च जोखिममा परेका छन् । बाढीले नदी तटीय क्षेत्रका विभिन्न स्थानमा ठूलो जनधनको क्षति पुर्‍याएको छ ।

विपद्पछि उद्धार कार्यलाई प्रभावकारी बनाउन रसुवा र नुवाकोटमा नेपाली सेना तथा निजी क्षेत्रका हेलिकोप्टर परिचालन गरिएको छ । उद्धार गरिएका तथा घाइतेको उपचारका लागि नुवाकोट जिल्ला अस्पतालमा पनि स्वास्थ्य टोली परिचालन गरिएको छ ।

अस्पतालमा नेपाली सेना, नेपाल प्रहरी र सशस्त्र प्रहरी बलका स्वास्थ्यकर्मीसँगै राष्ट्रिय ट्रमा सेन्टर, वीर अस्पताल र त्रिभुवन विश्वविद्यालय शिक्षण अस्पतालका चिकित्सकसहितको टोली खटिएको छ ।

यसैबीच, बाढी प्रभावितलाई तत्काल आश्रय, खाद्यान्न, खानेपानी र औषधि उपलब्ध गराउन नेपाली सेनाका विभिन्न ब्यारेकमा अस्थायी बसोबासको व्यवस्था गरिएको छ । प्रभावितको आवश्यकता अनुसार राहत तथा स्वास्थ्य सामग्री उपलब्ध गराउने कामसमेत जारी रहेको प्राधिकरणले जनाएको छ ।