बगेर गएका ७ वटा शव भारतको महाराजगञ्जमा भेटिए, नेपाल प्रशासनलाई भारतले गरायो जानकारी 

काठमाडौँ । रसुवाको भोटेकोशीमा आएको विनाशकारी बाढीपछि बाढीको पानीसँगै बगेर भारत पुगेका ७ जनाको शव भारतीय सुरक्षाकर्मीले फेला पारेका छन्। भारतको उत्तर प्रदेशस्थित महाराजगञ्जको गण्डक नदीबाट बिहीबार ४ तथा कुशीनगरको नारायणी नदीबाट ३ वटा शव बरामद गरिएको हो।

महाराजगञ्जमा बरामद ४ शवमध्ये ३ महिला र एक पुरुषको रहेको नायब तहसीलदार निचलौल पीयूषकुमार जायसवालले बताएका छन्। उनका अनुसार एक शव नारायणी नदीको बनकेसिया नजिक तथा तीन शव टेलफाल ठोकर नम्बर १ नजिक नदीमा बगिरहेको अवस्थामा एसडीआरएफको टोलीले देखेको थियो। स्टिमरको सहायताले ती शव निकालिएको हो।

बरामद चारै शव नेपाली नागरिकको हुन सक्ने आशंका गरिएको छ। यस्तै, कुशीनगरको नारायणी नदीमा बाढीको पानीसँगै बगेर आएका तीन शव पनि एसडीआरएफको टोलीले बरामद गरेको छ। ती शवलाई पहिचान तथा आवश्यक कानुनी प्रक्रियाका लागि ७२ घण्टासम्म मोर्चरीमा राखिएको  भारतीय प्रहरीले जनाएको छ।

यसैबीच, केही शव पनियहवा पुलमुनिबाट बगेर बिहारतर्फ पुगेको हुनसक्ने सम्भावनासमेत अधिकारीहरूले बताएका छन्। भारतमा बरामद भएका सातै शवको पहिचान तथा थप कारबाहीका लागि भारतीय प्रशासनले नेपालका सम्बन्धित प्रशासनिक अधिकारीलाई जानकारी गराइरहेको जनाएको छ।