भोटेकोशी बाढीपीडितका लागि नेपालगन्जका युवा व्यवसायी बेहनाद्वारा १ लाख ५१ हजार १ सय रुपैयाँ सहयोग

नेपालगन्ज । रसुवाको भोटेकोशीमा आएको विनाशकारी बाढीबाट प्रभावित परिवारको सहयोगका लागि नेपालगन्जका युवा व्यवसायी तथा नेकपा ९एमाले०का युवा नेता मोहम्मद सफिक बेहनाले १ लाख ५१ हजार १ सय रुपैयाँ सहयोग गरेका छन्।

प्रधानमन्त्री दैवी प्रकोप उद्धार कोषमा जम्मा गरिएको सहयोग रकमको रसिद बेहनाले बाँकेका प्रमुख जिल्ला अधिकारी दिलकुमार तामाङलाई हस्तान्तरण गरेका छन्। रसिद बुझ्दै प्रमुख जिल्ला अधिकारी तामाङले भोटेकोशी बाढीपीडितको राहत तथा उद्धारका लागि बेहनाले व्यक्तिगत रूपमा गरेको सहयोग प्रशंसनीय रहेको बताए।

नेपालगन्ज उपमहानगरपालिका–४ का पूर्ववडाध्यक्षसमेत रहेका बेहना विपद् तथा दुःखमा परेका नागरिकलाई सहयोग गर्दै आएका छन्। उनले यसपटक पनि भोटेकोशी बाढीबाट प्रभावित आमाबुवा, दाजुभाइ तथा दिदीबहिनीको सहयोगका लागि आफ्नो तर्फबाट १ लाख ५१ हजार १ सय रुपैयाँ प्रदान गरेको बताए।

बेहनाले विपद्को यस कठिन घडीमा सबैले आफ्नो क्षमताअनुसार सहयोग गर्न आग्रह गरेका छन्। ‘आफूले सक्ने जति सहयोग गरेर विपद्मा परेका नागरिकको साथ दिनुपर्छ,’ उनले भने।

प्रमुख जिल्ला अधिकारी तामाङले बाढीपीडितका लागि बेहनाले गरेको सहयोग प्रशंसनीय रहेको बताए। उनले दुःख र विपद्को समयमा व्यक्तिगत तथा संस्थागत रूपमा प्राप्त हुने सहयोगले प्रभावित परिवारको राहतमा महत्वपूर्ण योगदान पुग्ने उल्लेख गरे।