भोटेकोशी–त्रिशूली बाढीपछि १५ देशका १८४ पर्यटकको उद्धार, ४२० अझै सम्पर्कविहीन

काठमाडौँ । भोटेकोशी र त्रिशूली क्षेत्रमा भदौ १० गते आएको विनाशकारी बाढीपछि विभिन्न स्थानमा फसेका विदेशी पर्यटकको खोजी तथा उद्धार कार्य जारी छ। नेपाल पर्यटन बोर्डका अनुसार भदौ १३ गते दिउँसो १ः३० बजेसम्म १८४ जना पर्यटकको उद्धार गरिएको छ।

बोर्डका अनुसार उद्धार प्रयासका क्रममा थप तीन जना पर्यटक सम्पर्कमा आएका छन्। तर, अझै ४२० जना पर्यटकको अवस्था तथा स्थानबारे यकिन जानकारी प्राप्त हुन सकेको छैन।

पर्यटक प्रहरी तथा राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट प्राप्त विवरणका आधारमा बोर्डले उक्त तथ्यांक सार्वजनिक गरेको हो।

बोर्डको अर्को विवरणअनुसार बाढी प्रभावित क्षेत्रमा रहेका १५ देशका कुल १८७ जना विदेशी पर्यटक उद्धार वा सम्पर्कमा आएका छन्। यसमा उद्धार भएका १८४ र सम्पर्कमा आएका तीन जनालाई समावेश गरिएको छ।

उद्धार हुने पर्यटकमध्ये सबैभन्दा ठूलो संख्या भारतका ११४ जना रहेको छ। त्यस्तै चीनका २७, दक्षिण कोरियाका २०, माल्टा र जर्मनीका चार–चार, इटाली र अमेरिकाका तीन–तीन तथा रुस, स्पेन, स्विट्जरल्यान्ड र टर्कीका दुई–दुई जना पर्यटक रहेका छन्।

यसैगरी बेल्जियम, बुल्गेरिया, ओमान र पोर्चुगलका एक–एक जना पर्यटकको पनि उद्धार भएको बोर्डले जनाएको छ। बेल्जियमका एक तथा स्पेनका दुई पर्यटक भने सम्बन्धित निकायको सम्पर्कमा रहेको बताइएको छ।

बाढीका कारण पर्यटक आवागमन तथा उद्धारमा चुनौती देखिएपछि सुरक्षा निकाय, पर्यटक प्रहरी र सम्बन्धित सरकारी निकायले प्रभावित क्षेत्रमा खोज तथा उद्धारलाई निरन्तरता दिएका छन्। सम्पर्कविहीन पर्यटकको अवस्थाबारे थप विवरण संकलन गर्ने कामसमेत भइरहेको बोर्डले जनाएको छ।