भोटेकोशी बाढी: शव फेला पर्ने क्रम जारी, १ हजार ५६ शव फेला: नेपाल प्रहरी

काठमाडौं । रसुवाको भोटेकोशी क्षेत्रमा आएको विनाशकारी बाढीपछि खोज तथा उद्धारका क्रममा मंगलबार दिउँसो २ बजेसम्म विभिन्न जिल्लामा गरी १ हजार ५६ शव फेला परेको छ।

नेपल प्रहरीका अनुसार फेला परेका शवमध्ये रसुवामा ३८, नुवाकोटमा १५१, धादिङमा ५७, चितवनमा ३२१, गोरखामा ६५, तनहुँमा ३८, नवलपरासी पूर्वमा २१६, नवलपरासी पश्चिममा १६५ तथा भारतमा ५ वटा शव भेटिएका छन्।

फेला परेका शवमध्ये ९७२ वटा शवको लाशजाँच मुचुल्का सम्पन्न भइसकेको छ भने ५८ वटा शव आफन्तलाई बुझाइएको प्रहरीले जनाएको छ। पहिचान तथा आवश्यक कानुनी प्रक्रिया पूरा गरेपछि हालसम्म ६८४ शव व्यवस्थापन गरिएको छ। व्यवस्थापन गरिएकामध्ये १२१ महिला, १९८ पुरुष र ३६५ जनाको पहिचान खुल्न सकेको छैन।

पहिचान हुन नसकेका ८६९ शवको विवरण नेपाल प्रहरीको वेबसाइटमा सार्वजनिक गरिएको छ। शवको पहिचानका लागि डीएनए नमुना संकलनलगायत आवश्यक प्रक्रिया अघि बढाइएको प्रहरीले जनाएको छ।

बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनका लागि हालसम्म७ हजार ९१२ प्रहरी कर्मचारी परिचालन गरिएको छ। प्रभावित क्षेत्रबाट ४ हजार ५३० जनाको उद्धार गरिएको छ भने अझै४ हजार ६०६ जना बेपत्ताको खोजी भइरहेको प्रहरीले जनाएको छ।