सुरुङमाथिबाट खनेर भए पनि फसेकाको उद्धार गर्ने प्रयासमा छौं: गृहमन्त्री

काठमाडौं । गृहमन्त्री सुधन गुरुङले रसुवाको बाढीका कारण जलविद्युत् आयोजनाका सुरुङमा फसेका व्यक्तिको उद्धारका लागि वैकल्पिक उपायबाट समेत प्रयास भइरहेको बताएका छन्।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले आयोजना गरेको पत्रकार सम्मेलनमा गृहमन्त्री गुरुङले सुरुङको माथिल्लो भागबाट ड्रिल गरी उद्धारको सम्भावना खोजिरहेको जानकारी दिए।

उनका अनुसार सुरुङभित्र फसेकासम्म पुग्न माथिबाट खन्ने वा ड्रिल गर्ने उपाय अपनाउन सकिन्छ कि भन्नेबारे राज्य संयन्त्रले काम गरिरहेको छ। उद्धारका लागि यसअघि भइरहेका प्रयाससँगै नयाँ विकल्पबाट पनि सम्भावना खोजिएको उनको भनाइ छ।

गुरुङले सुरुङभित्र फसेका व्यक्तिको अवस्था अझै यकिन हुन नसके पनि सरकारले आशा नछाडेको बताए। उनीहरू जीवितै रहेको सम्भावनालाई ध्यानमा राखेर उद्धारका सबै सम्भावित उपायमा काम भइरहेको उनले उल्लेख गरे।

‘अझै पनि हामीले आशा मारेका छैनौं,’ गृहमन्त्री गुरुङले भने, ‘माथिबाट सुरुङमा प्रवेश गर्न सकिन्छ कि भन्ने सम्भावनासमेत हेरिरहेका छौं।’

उनले सुरुङभित्र रहेका व्यक्तिहरूले त्यहाँ उपलब्ध पानीबाट आफूलाई जोगाइरहेको हुनसक्ने सम्भावना पनि रहेको बताए। उद्धारका लागि सुरक्षा संयन्त्र निरन्तर परिचालित रहेको जानकारी दिँदै उनले सम्भावित सबै उपायबाट खोज तथा उद्धार कार्य जारी रहेको स्पष्ट पारे।