भोटेकोशी बाढी- हालसम्म १ हजार २५२ जनाको शव फेला: नेपाल प्रहरी

काठमाडौं । रसुवाको भोटेकोशीमा आएको विनाशकारी बाढीका कारण बिहीबार बिहान १० बजेसम्म १ हजार २ सय ५२ जनाको शव फेला परेको छ।

फेला परेका शवमध्ये रसुवामा १ सय २७, नुवाकोटमा १ सय ७७, धादिङमा ६०, चितवनमा ३ सय ५५, गोरखामा ६९, तनहुँमा ३८, नवलपरासी पूर्वमा २ सय १८ र नवलपरासी पश्चिममा १ सय ९० जनाको शव फेला परेको छ। यस्तै, भारतमा फेला परेको र नवलपरासी पश्चिममा बुझाइएको १८ वटा शवसमेत गरी कुल १ हजार २ सय ५२ जनाको शव फेला परेको प्रहरीले जनाएको छ।

फेला परेका शवमध्ये ९५ वटा शव आफन्तलाई बुझाइएको छ।

शवको पहिचानका लागि डीएनए नमुना संकलनलगायत आवश्यक प्रक्रिया पूरा गरी हालसम्म २ सय १३ महिला, ३ सय १४ पुरुष र पहिचान खुल्न नसकेका ३ सय ७० गरी जम्मा ८ सय ९७ वटा शव व्यवस्थापन गरिएको छ। ती शवलाई माटोमुनि सुरक्षित राखिएको प्रहरीले जनाएको छ।

यस्तै, पहिचान हुन नसकेका ९ सय ५९ वटा शवको विवरण नेपाल प्रहरीको वेबसाइटमा अपलोड गरिएको छ।

बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनलगायतका कार्यका लागि हालसम्म ७ हजार ९ सय १२ जना प्रहरी कर्मचारी परिचालन गरिएको छ। बाढीका कारण बेपत्ता भएका ४ हजार ८ सय ७५ जनाको खोजी कार्य जारी रहेको प्रहरीले जनाएको छ।

यसैगरी, विभिन्न जिल्लामा रहेका होल्डिङ सेन्टरमा ३ हजार १ सय २६ जना व्यक्तिलाई राखिएको छ।

प्रहरीले बाढीको जोखिममा रहेका विभिन्न जिल्लाका घरपरिवारलाई सुरक्षित स्थानमा स्थानान्तरण गर्नुका साथै स्थानीयवासी तथा विभिन्न निकायसँगको समन्वय र सहकार्यमा उद्धार तथा खोजी कार्य गरिरहेको छ। साथै, बाढीका कारण विभिन्न स्थानमा अवरुद्ध भएका सडक तथा बाटो खुलाउने कार्यसमेत जारी राखिएको प्रहरीले जनाएको छ।