उद्धारमा खटिएका सुरक्षाकर्मी र कर्मचारीलाई जोखिम भत्ता, मृत्यु भए परिवारलाई १० लाख राहत

काठमाडौं। रसुवाको भोटेकोशी नदीमा आएको विनाशकारी बाढीपछि खोज तथा उद्धारमा खटिएका सुरक्षाकर्मी तथा राष्ट्रसेवक कर्मचारीलाई सरकारले विशेष सुविधा उपलब्ध गराउने निर्णय गरेको छ।

आज बसेको मन्त्रिपरिषद् बैठकले उद्धार तथा खोजी कार्यमा खटिएका नेपाली सेना, नेपाल प्रहरी, सशस्त्र प्रहरी बल तथा राष्ट्रसेवक कर्मचारीलाई जोखिम भत्ता र खाजा खर्च उपलब्ध गराउने निर्णय गरेको हो।

यस्तै, उद्धारका क्रममा घाइते हुने सुरक्षाकर्मी तथा राष्ट्रसेवक कर्मचारीको निःशुल्क औषधि उपचारको व्यवस्था गर्ने निर्णय पनि मन्त्रिपरिषद्ले गरेको छ।

बाढीपछिको खोज तथा उद्धार कार्यमा खटिँदा कुनै सुरक्षाकर्मी वा राष्ट्रसेवक कर्मचारीको मृत्यु भएमा निजको परिवारलाई प्रतिमृतक १० लाख रुपैयाँ राहत उपलब्ध गराउने निर्णयसमेत भएको छ।

सरकारले भोटेकोशी बाढीपछि जारी खोज तथा उद्धार कार्यमा सुरक्षाकर्मी तथा राष्ट्रसेवक कर्मचारीले पुर्‍याएको योगदान र जोखिमलाई ध्यानमा राख्दै उक्त सुविधा दिने निर्णय गरेको हो।