सम्पर्कविहीनको पहिचानका लागि बर्दियामा ५५ जनाको डीएनए नमुना संकलन, आज पनि जारी

बर्दिया। बाढीपछि सम्पर्कविहीन भएका नागरिकको पहिचान गर्न बर्दियामा डीएनए नमुना संकलनको काम जारी छ। जिल्ला प्रहरी कार्यालय, गुलरियामा आज बिहानदेखि आफन्तबाट नमुना लिने काम भइरहेको हो।

हालसम्म ५५ जनाको डीएनए नमुना संकलन गरिएको छ। सम्पर्कविहीन व्यक्तिका बाबु, आमा, छोरा वा छोरीमध्ये कुनै एकजनाबाट नमुना लिइँदैछ। आज पनि बिहान ९ बजेदेखि साँझ ५ बजेसम्म नमुना संकलन गरिने प्रहरीले जनाएको छ।

बर्दियामा बारबर्दिया र बाँसगढी नगरपालिका तथा गेरुवा गाउँपालिकालगायतका क्षेत्रमा बाढीपछि ७४ जना सम्पर्कविहीन रहेको जिल्ला प्रहरी कार्यालयले जनाएको छ। उनीहरूको पहिचानका लागि संकलित नमुनालाई वैज्ञानिक परीक्षणमार्फत सम्भावित शव तथा व्यक्तिसँग मिलान गर्ने तयारी छ।

नमुना दिन आउने आफन्तले परिचय खुल्ने आधिकारिक कागजात र पासपोर्ट साइजका दुई प्रति फोटो साथमा ल्याउनुपर्नेछ। नमुना संकलन कार्यमा जिल्ला अस्पतालले समेत सहयोग गरिरहेको छ। सम्पर्कविहीनको संख्या र पहिचानको अवस्थाअनुसार नमुना संकलनलाई थप निरन्तरता दिइने प्रहरीको भनाइ छ।