नेपालमा बिक्री गर्न भारतबाट ल्याइएको १९७ ग्रामबढी हेरोइन बरामद, भारतीयसहित दुई पक्राउ

काठमाडौं ।  मधेश  र बागमती प्रदेशका विभिन्न जिल्लामा बिक्री गर्ने उद्देश्यले भारतबाट ल्याइएको १९७ ग्रामभन्दा बढी ब्राउन सुगरसहित दुई जनालाई प्रहरीले पक्राउ गरेको छ।

लागूऔषध नियन्त्रण ब्यूरो कोटेश्वर र शाखा कार्यालय बर्दिबास, महोत्तरीबाट खटिएको संयुक्त टोलीले आज धनुषाको मिथिला नगरपालिका–२ बाट भारतको बिहारस्थित मधुवनीका २७ वर्षीय संजित कुमार राम र धनुषाको सबैला नगरपालिका–१० का २६ वर्षीय राकेश रामलाई पक्राउ गरिएको लागूऔषध नियन्त्रण ब्यूरो कोटेश्वरले जनाएको छ।

ब्यूरोका अनुसार उनीहरूले भारतको मधुवनीबाट खैरो हेरोइन खरिद तथा संकलन गरी नेपाल ल्याएर मधेश र बागमती प्रदेशका विभिन्न जिल्लामा बिक्री गर्ने गरेको प्रारम्भिक अनुसन्धानबाट खुलेको छ।

उनीहरूको साथबाट १९७.४४० ग्राम खैरो हेरोइन र दुई थान मोबाइल फोन बरामद गरिएको ब्यूरोले जानकारी दिएको छ।

पक्राउ परेका दुवै जनालाई थप अनुसन्धान तथा आवश्यक कारबाहीका लागि इलाका प्रहरी कार्यालय महेन्द्रनगरमा बुझाइएको ब्यूरोले जनाएको छ ।