स्रोत नखुलेको लाखौं विदेशी मुद्रासहित भारतीय नागरिक त्रिभुवन विमानस्थलबाट पक्राउ

काठमाडौँ । त्रिभुवन अन्तर्राष्ट्रिय विमानस्थलबाट ठूलो परिमाणमा स्रोत नखुलेको विदेशी मुद्रासहित एक भारतीय नागरिक पक्राउ परेका छन्।

पक्राउ पर्नेमा भारतको बैङ्गलौर निवासी ३६ वर्षीय जगदिश मोहन राव रहेका छन्।

विमानस्थल प्रहरीका अनुसार भदौ २३ गते नेपाल वायुसेवा निगमको आरए–२२५ नम्बरको उडानमार्फत काठमाडौँबाट बैङ्गलौर जान लागेका रावलाई विमानस्थलको ब्यागेज चेकिङ क्षेत्रबाट नियन्त्रणमा लिइएको हो।

एक्स–रेमार्फत उनको ब्यागेज जाँच गर्ने क्रममा विभिन्न देशका मुद्रा फेला परेको प्रहरीले जनाएको छ। उनको साथबाट स्रोत नखुलेको ६ लाख ३५ हजार भारतीय रुपैयाँ, ६३५ चिनियाँ युआन, १० हङकङ डलर, ११ लाख ८६ हजार भियतनामी डोङ र १७० थाइल्यान्ड भाट बरामद भएको छ।

अवैध रूपमा लुकाइछिपाई विदेशी मुद्रा लैजान खोजेको आरोपमा पक्राउ परेका रावलाई थप अनुसन्धान तथा कानुनी कारबाहीका लागि ललितपुरको पुल्चोकस्थित सम्पत्ति शुद्धीकरण अनुसन्धान विभागमा पठाइएको त्रिभुवन अन्तर्राष्ट्रिय विमानस्थल सुरक्षा कार्यालयले जनाएको छ।