भगवानपुर प्रहरी कार्यालयको निरीक्षण, शान्ति सुरक्षा कायम गर्न निर्देशन

नरैनापुर। बाँकेका प्रमुख जिल्ला अधिकारी दिलकुमार तामाङ र जिल्ला प्रहरी कार्यालय बाँकेका प्रहरी उपरीक्षक अङ्गुर जिसीले इलाका प्रहरी कार्यालय भगवानपुरको निरीक्षण तथा अनुगमन गरेका छन्।

निरीक्षणका क्रममा उनीहरूले आज कार्यालयका विभिन्न कक्ष, हिरासत कक्ष, मेसलगायतका स्थानको अवलोकन गर्नुका साथै कार्यालयको समग्र अवस्था र प्रहरी गतिविधिबारे जानकारी लिएका थिए।

निरीक्षणका क्रममा प्रमुख जिल्ला अधिकारी तामाङ र प्रहरी उपरीक्षक जिसीले स्थानीयस्तरमा शान्ति सुरक्षा कायम गर्दै सीमा अपराध नियन्त्रणमा प्रभावकारी रूपमा काम गर्न प्रहरी कर्मचारीलाई निर्देशन दिएका थिए।

त्यस्तै, लागूऔषध नियन्त्रण, सीमा क्षेत्रमा हुने अवैध गतिविधिको निगरानी तथा विपद्का समयमा उद्धार र प्रतिकार्यका लागि आवश्यक तयारी अवस्थामा रहनसमेत निर्देशन दिइएको थियो।

सीमा क्षेत्रमा हुने अपराध तथा गैरकानुनी गतिविधि नियन्त्रणका लागि स्थानीय समुदाय र सम्बन्धित निकायसँग समन्वय गरी प्रभावकारी रूपमा काम गर्न उनीहरूले जोड दिएका थिए।

निरीक्षणका क्रममा भगवानपुर प्रहरी प्रमुख प्रहरी निरीक्षक सुरेश कोइराला लगायत सकल दर्जाको उपस्थिति रहेको थियो।