भोटेकोशी बाढी अपडेट: हालसम्म १ हजार ३ सय ८५ शव फेला

काठमाडौं । रसुवाको भोटेकोशी नदीमा आएको बाढीपछि जारी खोज तथा उद्धारका क्रममा हालसम्म १ हजार ३ सय ८५ वटा शव तथा मानव अंग फेला परेको छ। नेपाल प्रहरीले अद्यावधिक तथ्यांक सार्वजनिक गर्दै खोज, उद्धार तथा व्यवस्थापनको पछिल्लो अवस्था सार्वजनिक गरेको हो।

प्रहरीका अनुसार फेला परेका शवमध्ये ५४२ पुरुष र ३३८ महिला रहेका छन् भने ५०५ वटा आंशिक मानव अंग फेला परेका छन्। फेला परेका शवमध्ये १०३ वटा पहिचान गरी आफन्तलाई हस्तान्तरण गरिसकिएको छ भने १ हजार १४८ वटा शव सुरक्षित तवरले जमिनमुनि व्यवस्थापन गरिएको छ।

त्यस्तै, पहिचान हुन नसकेका १ हजार ३२६ वटा शवको विवरण नेपाल प्रहरीको वेबसाइटमा अपलोड गरिएको छ। शव पहिचानका लागि मृतकका १ हजार २८६ र मृतकका आफन्तका १ हजार ७१२ गरी कुल २ हजार ९९८ जनाको डीएनए नमुना सङ्कलन गरिएको प्रहरीले जनाएको छ।

बाढीमा परी हालसम्म ४ हजार ८९ जना बेपत्ता रहेका छन्। बेपत्ता हुनेमा ३ हजार ४७९ जना स्वदेशी नागरिक छन्। जसमा २ हजार ९०७ पुरुष र ५७२ महिला रहेका छन्। त्यस्तै, विदेशी नागरिक ६१० जना बेपत्ता छन्, जसमा २७२ पुरुष, ३२८ महिला र १० जना अन्य रहेका छन्।

आपत्कालीन उद्धारअन्तर्गत हालसम्म घाइते तथा प्रभावित गरी ९ हजार २८७ जनाको उद्धार गरिएको छ। उद्धार गरिएकामध्ये ६ हजार ४०७ पुरुष, २ हजार ८३० महिला र ५० जना पहिचान नखुलेका व्यक्ति रहेका छन्। उद्धार गरिएका नागरिकमध्ये हाल ३ हजार १७६ जना विभिन्न होल्डिङ सेन्टरमा आश्रित छन्।

प्रभावित क्षेत्रमा खोज तथा उद्धारका लागि ७ हजार ८७५ जना प्रहरी जनशक्ति परिचालन गरिएको छ। बाढीका कारण २५ जना प्रहरी कर्मचारी अझै सम्पर्कविहीन छन् भने ६५ जना प्रहरी कर्मचारी प्रभावित भएका छन्।

यसैगरी, विपद् जोखिम न्यूनीकरण तथा सचेतना अभिवृद्धिका लागि प्रभावित क्षेत्रमा १६६ वटा जनचेतनामूलक कार्यक्रम सञ्चालन गरिएको छ। ती कार्यक्रममा ४५ हजार २३८ जना स्थानीय नागरिकको सहभागिता रहेको नेपाल प्रहरीले जनाएको छ।