इजरायल रोजगारी ठगीमा कांग्रेस नेतृ खड्का पक्राउ

काठमाडौँ । नेपाली कांग्रेसको १५औँ महाधिवेशनमा केन्द्रीय सदस्य पदकी उम्मेदवार बनेकी बिनिता खड्का वैदेशिक रोजगारी ठगीको आरोपमा पक्राउ परेकी छन्।

इजरायलमा केयर गिभरको काम दिलाइदिने भन्दै रकम असुलिएको घटनाको अनुसन्धानका क्रममा खड्कालाई नेपाल प्रहरीको केन्द्रीय अनुसन्धान ब्युरो ९सीआईबी० ले शुक्रबार राष्ट्रिय सभागृह आसपासबाट नियन्त्रणमा लिएको हो।

सीआईबीका प्रवक्ता एसएसपी अनुपम शमशेर जबराका अनुसार ठगीबाट प्राप्त रकम बाँडफाँटमा खड्काको भूमिका देखिएपछि उनलाई पक्राउ गरिएको हो। यो घटनामा यसअघि चार जना प्रहरीको नियन्त्रणमा परिसकेका छन्।

प्रहरी अनुसन्धानले इजरायलमा रोजगारीको अवसर मिलाइदिने आश्वासन दिएर सर्वसाधारणबाट २ करोड ५० लाख रुपैयाँ उठाइएको देखाएको छ। उक्त प्रकरणमा कांग्रेसका पूर्वमहाधिवेशन प्रतिनिधि भरत चौलागाईं, बालिका सिवाकोटी, ज्ञानबहादुर कार्की र शिवराम श्रेष्ठ पक्राउ परेका थिए।

अनुसन्धानमा सिवाकोटीले आफूले उठाएको रकममध्ये डेढ करोड रुपैयाँ चौलागाईंलाई दिएको बयान दिएको प्रहरीको भनाइ छ। प्रधानमन्त्रीका प्रमुख सल्लाहकार कुमार बेनको नामसमेत दुरुपयोग गरेर रकम असुलिएको आरोप छ।

सरकारले सन् २०२४ मा इजरायलमा कामदार पठाउन सञ्चालन गरेको छनोट प्रक्रियामा लक्की ड्रमार्फत २ हजार ९९ जना छानिएका थिए। छनोटमा नपरेका १५६ जनालाई पनि इजरायल पठाइदिने भन्दै रकम लिएको आरोप प्रहरीको छ। यसै प्रकरणमा चौलागाईंलाई असोज १ गते रामेछापको मन्थलीबाट पक्राउ गरिएको थियो। घटनाबारे थप अनुसन्धान भइरहेको प्रहरीले जनाएको छ।