टिपरमा बालुवा र गिट्टीले छोपेर तस्करी हुँदै गरेको १७ क्विन्टल गाँजासहित चालक पक्राउ

सप्तरी । नेपाल प्रहरीको टोलीले टिपरमा बालुवा र गिट्टीले छोपेर अवैध रुपले तस्करी गर्दै गरेको १७ क्विन्टल बढी गाँजासहित चालकलाई पक्राउ गरेको छ।

सप्तरीको राजगढ गाउँपालिका–४ बाट टिपरमा बालुवा र गिट्टीले छोपेर लैजाँदै गरिएको १७ क्विन्टल ३६ किलो गाँजा राजगढ गाउँपालिका–४ बेल्ही चपेना शनि मन्दिरस्थित भित्री सडक खण्डमा पत्थरगाढाबाट झुटकीतर्फ गइरहेको टिपरसहित चालकलाई गए राति पक्राउ गरेको सप्तरी प्रहरीले जानकारी दिएको छ।

सप्तरी प्रहरीका अनुसार टिपर चेक गर्दा ५६ बोरा गाँजा फेला परेको हो । प्रहरीले धनकुटास्थित  सहिदभूमि गाउँपालिका–३ का ३३ वर्षीय  टिपर चालक यमजित राईलाई पक्राउ गरेको जनाएको छ । 

ठुलो परिमाणको गाँजासहित पक्राउ परेका चालकलाई हिरासतमा राखेर थप अनुसन्धान प्रक्रिया अघि बढाइएको जिल्ला प्रहरी कार्यालय सप्तरीले जनाएको छ।