सडक खन्ने क्रममा पहिरोमा पुरिएर एक्साभेटर चालकको मृत्यु

धौलागिरी। सडक खन्ने क्रममा पहिरोमा पुरिएर एक्साभेटर चालकको मृत्यु भएको छ। म्याग्दीको दरखोला जलविद्युत् आयोजनामा सडक खन्ने क्रममा पहिरोमा पुरिएर एक्साभेटर चालक स्याङ्जा चापाकोट नगरपालिका वडा नं ८ का ३२ वर्षीय खेमराज कुमालको मृत्यु भएको प्रहरीले जानकारी दिएको छ।

जिल्ला प्रहरी कार्यालय म्याग्दीका अनुसार धवलागिरी गाउँपालिका वडा नं ३ मुनास्थित निर्माणाधीन दरखोला जलविद्युत् आयोजनाको पाइपलाइनका लागि मोटरबाटो खन्ने क्रममा अचानक पहिरो खस्दा कुमाल पुरिएका थिए ।

उनको घटनास्थलमै ज्यान गएको प्रहरीले जनाएको छ ।उनको शव परीक्षणका लागि प्रदेश अस्पताल बेनी ल्याइएको ताकम प्रहरी चौकीका प्रहरी सहायक निरीक्षक विक्रम तिवारीले जानकारी दिएका छन् ।

सो पहिरोमा एक्साभेटर समेत पुरिएर पूर्णरुपमा क्षति भएको छ । घटनाबारे अनुसन्धान भइरहेको प्रहरीले जानकारी दिएको छ।