अमेरिकन डलर देखाएर ३० लाख रुपैयाँ ठगी गर्ने तारा बहादुर अपराध अनुसन्धान कार्यालयको नियन्त्रणमा

काठमाडौं। डलर देखाई रकम ठगी गरेको आरोपमा प्रहरीले एक जनालाई पक्राउ गरेको छ। प्रहरी प्रधान कार्यालयका अनुसार पक्राउ पर्नेमा भक्तपुरको चाँगुनारायण नगरपालिका-३ दुवाकोट बस्ने सिन्धुपाल्चोक बाह्रबिसे नगरपालिका-३ घर भएका ३९ वर्षीय तारा बहादुर तामाङ रहेका छन् ।

प्रहरी प्रधान कार्यालयका अनुसार नवलपरासी पूर्वस्थित  गैंडाकोट नगरपालिका-३ ढोडेनीमा विभिन्न व्यक्तिहरूलाई फोन सम्पर्क गरी सस्तो दरमा अमेरिकन डलर मिलाई दिन्छु भनि प्रलोभनमा पारेर पीडितलाई डलरको आकारमा काटिएको कागजको बिटो रूमालमा पोको पारेर दिएर  नेपाली ३० लाख रूपैयाँ लिई ठगी गरेका हुन् ।

ठगी गरेको उजुरीका आधारमा तारा बहादुरलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले भक्तपुर चाँगुनारायण नगरपालिका-३ दुवाकोटबाट पक्राउ गरेको हो । 

तारा बहादुरलाई आवश्यक अनुसन्धान तथा कारवाहीको लागि जिल्ला प्रहरी कार्यालय नवलपरासी पूर्व पठाइएको प्रहरी प्रधान कार्यालयले जनाएको छ।