९ ग्राम बढी खैरो हेरोइनसहित २३ वर्षीया महिला पक्राउ 

कपिलवस्तु । कपिलवस्तुको शिवराज नगरपालिका–२, हल्लानगरबाट ९ ग्रामबढी   खैरो हेरोइनसहित एकजना महिला पक्राउ परेकी छन्।

पक्राउ पर्नेमा शिवराज नगरपालिका–२, हल्लानगरकी २३ वर्षीया अस्मिता बोहोरा रहेकी प्रहरीले जनाएको छ।

प्रहरीका अनुसार बोहोराले आफ्नै घरमा लागूऔषधको कारोबार गर्ने गरेको विशेष सूचनाका आधारमा वडा प्रहरी कार्यालय चन्द्रौटा, कपिलवस्तुबाट खटिएको प्रहरी टोलीले उनको घरमा खानतलासी गरेको थियो।

खानतलासीका क्रममा कोठामा रहेको दराजमाथि राखिएको कालो रङको लेडिज ब्यागभित्र खैरो रङको धुलो पदार्थ फेला परेको थियो। उक्त पदार्थ लागूऔषध ब्राउन सुगर रहेको र त्यसको तौल ९ ग्राम २४० मिलिग्राम रहेको प्रहरीले जनाएको छ।

प्रहरीले घटनास्थलबाट लागूऔषध तौल गर्न प्रयोग गरिने एउटा डिजिटल तौल मेसिनसमेत बरामद गरेको छ। बरामद लागूऔषध र तौल मेसिनसहित बोहोरालाई नियन्त्रणमा लिई वडा प्रहरी कार्यालय चन्द्रौटा, कपिलवस्तुमा ल्याइएको छ।

घटनाका सम्बन्धमा प्रहरीले थप अनुसन्धान गरिरहेको जनाएको छ।