अनलाइन बेटिङ गिरोहमा संलग्न १७ जना पक्राउ, गिरोहमा थिए ५ भारतीय नागरिक

काठमाडौं । काठमाडौं उपत्यका अपराध अनुसन्धान कार्यालयले अनलाइन सट्टेबाजी (अनलाइन बेटिङ) खेलाएको आरोपमा १७ जनालाई पक्राउ गरेको छ।

अपराध अनुसन्धान कार्यालयका अनुसार काठमाडौँ र ललितपुरबाट आइपिएल खेलको सट्टेबाजी गराएको आरोपमा १७ जनालाई पक्राउ गरिएको हो।

एसपी काजी कुमार आचार्यले दिएको जानकारी अनुसार  काठमाडौंको धापासीबाट १५ जना र ललितपुरको सनराइज अपार्टमेन्टबाट २ जनालाई पक्राउ गरिएको हो।

अनलाइन सट्टेबाजी खेलाएको आरोपमा पक्राउ पर्नेमा कञ्चनपुरका ३० वर्षीय राजेन्द्र बहादुर महत, अछाम घर भएका २९ वर्षीय डायमन्ड कुँवर, २१ वर्षीय मनोज बोगटी, कैलाली घर भएका २१ वर्षीय अरविन कुमार खड्का,दाङका विष्णु कुमार राउत, डोटीका ठक्क कुँवर, तिलक खड्का, पुर्व नवलपरासीका जीत बहादुर महतो, डोटीका सुवास खड्का , अछामका विकाश थापा र डोटीका २३ वर्षीय हर्क बहादुर खड्का,रुपन्देही घर भएका २६ वर्षीय पूर्ण बहादुर दर्लामी मगर रहेको एसपी आचार्यले बताए। 

यसैगरी पक्राउ पर्नेमा भारतीय नागरिकहरू क्रमशः  ऋषभ राज, २६ वर्षीय दीपक कुमार सिंह, २५ वर्षीय अङ्कित कुमार सिंह, धिरज कुमार सिंह र मोहित कुमार सिंहलाई पक्राउ गरिएको एसपी आचार्यले जानकारी दिएका छन् ।