नेपालगञ्जको उदयपुरबाट १०३ ग्राम बढी खैरो हेरोइनसहित २ जना लागुऔषध नियन्त्रण ब्यूरोको फन्दामा

नेपालगञ्ज । नेपालगञ्जस्थित लागुऔषध नियन्त्रण ब्यूरोले ठुलो सफलता हात पारेको छ।नेपालगञ्जबाट ठुलो परिमाणमा खैरो हेरोइनसहित दुई जना पक्राउ गरिएको छ । नेपालगञ्ज उपमहानगरपालिका वडा नम्बर १४ उदयपुरुवाका ५८ बर्षीय सुरत खटिक र सोही ठाउँका १८ बर्षीय सुनिल खटिक आज दिउँसो १०३ ग्राम ९०० मिलिग्राम खैरो हेरोइनसहित पक्राउ परेका हुन् । 

जिल्ला प्रहरी बाँकेका  अनुसार दुबै जनालाई विशेष सुराकीको आधारमा लागुऔषध नियन्त्रण ब्यूरो शाखा कार्यालय नेपालगञ्जबाट  फेला पारी कानुन बमोजिम खानतलासी गर्दा सुनिलले लगाएको कालो जिन्स पाइन्टको दाहिने खल्तीभित्र लुकाई राखेको अवस्थामा उक्त खैरो हेरोइन भेटिएको हो । उनीहरुबाट एक थान मोबाइल समेत बरामद गरिएको छ ।

लागुऔषध नियन्त्रण ब्यूरो नेपालगञ्जको टोलीले दुई जनालाई नियन्त्रणमा लिएको हो । प्रहरी सहायक निरीक्षक नविन कुमार शाहीको कामाण्डमा टोली खटिएको थियो । उनीहलाई आवश्यक कारवाहीको लागि जिल्ला प्रहरी कार्यालय बाँकेमा बुझाइएको छ । 

लागुऔषध नियन्त्रण ब्यूरो नेपालगञ्जमा प्रहरी सहायक निरीक्षक शाही आएदेखि लागुऔषध कारोबारीहरुलाई विशेष निगरानी राख्दै धमाधम लागुऔषधसहित कारोबारीलाई पक्राउ गर्दै अएका छन्।